Túrksib aýdany Tótenshe jaǵdaılar basqarmasy 19 qazan – Qutqarýshylar kúnin merekeleý qarsańynda «Ashyq esik» kúnin ótkizdi.
Kásiptik mereke qarsańynda №11 órtke sóndirý-qutqarý qyzmeti bóliminiń bazasynda uıymdastyrylǵan saltanatty jıynda salanyń jetekshi mamandary jıylǵan qaýymǵa jetijuttyń biri – órt apatymen betpe-bet kelip, kókala tútinge kómilse de, alaýmen arpalysatyn jalyndy jankeshti mamandyqtyń qyr-syryn ashyp bergendeı. Mamandar jıylǵan jasóspirimderge tótenshe jaǵdaılar qyzmetshilerin daıarlaıtyn oqý oryndary jaıly aqparat ta berildi. Apat aıtyp kelmes, osy kúnge deıin órt sóndirýshi-qutqarýshy mamandar sol «tilsiz jaý» atalatyn dúleı apattan qanshama adamdy arashalap, sonshama qoǵam men memleket múlkin qutqaryp qalǵanyn statısıka saırap aıtyp beredi.
Jaýynger mamandyqtyń jaýapkershiligi qat-qabat, qıyndyǵy men qyzyǵy qatar júredi. Tóńirektiń belsendi turǵyndary, balabaqsha men mektep oqýshylary bul kúni órt sóndirý-qutqarý qyzmetiniń qural jabdyqtary, órt sóndirý tehnıkalary men saımandarymen tanystyryldy. «Arýaq razy bolmaı, tiri baımas» degen, 1989 jylǵy maýsymda «Almaty-2» temirjol beketinde bolǵan alapat órt apaty kezinde erlikpen qaza tapqan órt sóndirýshi qyzmetshilerdiń rýhyna baǵyshtalǵan eskertkish-belgige gúlshoǵyryn qoıý rásimi ótti. Órt sóndirý-qutqarý qyzmetiniń ardagerleri ótken qyzmettik shaqty eske alyp, jastarǵa aq tilegin arnady.
Kásibı mereke qarsańynda uıymdastyrylǵan bul sharanyń maqsaty – qoǵam men eldiń qaýipsizdigine ólsheýsiz úles qosyp otyrǵan órt sóndirý-qutqarý qyzmetine óskeleń urpaqtyń nazaryn aýdarý. Órt sóndirýshi-qutqarýshy mamandyǵynyń qadirin arttyrý qajet. Jas órenderdiń qarapaıym órt qaýipsizdigi erejesine mán berip, onyń negizine kóńil bólýin qalap, oqýshylarǵa osy salada qoldanylatyn arnaýly qural-jabdyqtardy kózben kórip, qolmen ustaýǵa jaǵdaı jasaldy.
«Órt – tilsiz jaý ekeni sózsiz. Osyǵan oraı, qarapaıym órt qaýipsizdigi erejesin, qutqarý daǵdysyn balabaqshadan bastap úıretsek, keremet emes pe. Osyny oılastyrdyq. Mektep oqýshylary arasynda bul mamandyqqa qyzyǵýshylyq az emes. Osy bir qyzyǵýshylyq kásiptik daǵdyǵa aınalyp, olardyń birazynyń bolashaqta bizdiń qatarymyzǵa qosylýyna ıgi áser eter degen oıdamyz. Iá, bul – ońaı kásip emes, qıyndyǵy men qyzyǵy qatar júretin mamandyq. Qyzyǵy degende, «Alǵyspen er kógerer» qazaqtyń danalyq sózin aıtamyn. Qyzmetimen qadirli bolyp, el-jurttyń alǵysyn alyp júrgenge ne jetsin», – deıdi QR Tótenshe jaǵdaılar mınıstrliginiń ardageri, qordaǵy (zapastaǵy) órtke qarsy qyzmet podpolkovnıgi Gúlshat Dáýrenbekova.