Ázirge tólemderdiń qazirgi mólsherine qansha teńge qosylatyny belgisiz
Memlekettik áleýmettik saqtandyrý qorynan 300 myńnan astam ana júktiligi boıynsha tólem alyp otyr. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtyp berdi, dep habarlaıdy Almaty-akshamy.kz Almaty.tv –ge silteme jasap.
«Memlekettik áleýmettik saqtandyrý qorynan 300 myńnan astam ana júktiligi boıynsha burynǵy ortasha eńbekaqysynyń 100 paıyzyn, al balaǵa qaraý kezeńinde eńbekaqysynyń 40 paıyzyn alyp otyr. Sondaı-aq, jumyssyz qalǵan 105 myń azamatqa olardyń eńbekaqysynyń 40 paıyzyna deıin 6 aıǵa deıin berilip jatyr. Keıingi jyldary bul tólemderdiń mólsherin edáýir kóterý máselesi qarastyrylýda», - dedi Tamara Dúısenova Úkimet otyrysynda.
Onyń aıtýynsha, bul dekrette otyrǵan áıelderge jalaqynyń kóp bóligin alýǵa múmkindik beredi. Ázirge tólemderdiń qazirgi mólsherine qansha teńge qosylatyny belgisiz.
Tamara Dúısenova taksı júrgizýshileri men kýrerlerdi áleýmettik qamsyzdandyrý máselesi qarastyrylyp jatqanyn aıtty.
«Saraptamalyq málimetterge júginsek, Qazaqstanda 500 myńdaı adam platformalyq jumyspen qamtylǵan. Iaǵnı, azamattar Iandeks, Ýber, Vólt jáne Glovo sıaqty túrli onlaın-platformalar arqyly jumys isteıdi. Mundaı rejım turǵyndarǵa óte yńǵaıly ekeni sózsiz. Alaıda onyń basty kemshiligi – jumyspen qamtylǵandar úshin áleýmettik kepildiktiń joqtyǵy», – dedi QR Eńbek jáne halyqty áleýmettik qorǵaý mınıstri Tamara Dúısenova.