Mádenıet jáne aqparat mınıstri Aıda Balaeva mektepte hıdjab kıý máselesine qatysty Facebook paraqshasynda jazba qaldyrdy, dep habarlaıdy Almaty-akshamy.kz.
«Qazir áleýmettik jelide mektepterde hıdjab kıý máselesine qatysty talqy toqtar emes. Osyǵan baılanysty, dinı salaǵa jaýapty laýazymdy tulǵa retinde, óz tarapymnan túsinikteme berýdi jón kórip otyrmyn. Atazańymyzǵa sáıkes Qazaqstanda din memleketten bólingen. Sóz joq, memleket din bostandyǵyna kepildik beredi. Biraq biz - zaıyrly elmiz! Sol úshin de memlekettik saıasattyń barlyq máseleleri dinı pátýalarmen emes, azamattyq normalarmen retteledi. Quqyqtyq-normatıvti aktiler árbir oqýshyǵa mektep qabyrǵasynda arnaıy bekitilgen forma kıýdi mindetteıdi. Óıtkeni, bilim berý ereksheligi biryńǵaılyqty talap etedi. Al Konstıtýsıamyz boıynsha mekteptiń mindeti – el azamattaryna sapaly bilim berýge kepildik berý jáne ony qamtamasyz etý. Sondyqtan da, mektepte bala eń aldymen sapaly bilim alýy kerek. Sodan keıin baryp, erjete kele dinı nanym-senimin, qandaı kıim úlgisin kıetinin ózi sheshedi dep oılaımyn», - delingen jazbada.