16 jastaǵy Jibek Qulymbetova Dýbaıda ótken AJP Tour Asia Continental Jiu-jitsu Championship 2023 - Professional jarysynda birden eki altyn medal jeńip aldy, dep habarlaıdy Almaty-akshamy.kz.
«Kúlgin» belbeýdiń ıegeri Jibek Qulymbetova atalǵan jarysta birinshi altyn medaldi óz jasynda, ıaǵnı, 16-17 jas aralyǵynda, ekinshi altyn medaldi 18 jastan joǵary sportshylar arasynda jeńip aldy. 18 jastan joǵary sportshylar arasynda úsh kezdesý ótkizdi. Fınalda qarsylasy ózinen 9 jas úlken, 25 jastaǵy arabtyń sportshysy Maıta Sheraımdy jeńdi.
«Dýbaıda ótken osy jarysqa attanar kezde Prezıdentimiz Qasym-Jomart Toqaevpen kezdesip, sporttaǵy jetistigimdi aıtyp, aldaǵy josparlarymmen bólisken edim. Qasym-Jomart Kemeluly jarystaryma sáttilik tilep, maǵan qanat bitirdi. Prezıdentpen kezdesý men úshin úlken motıvasıa boldy jáne keremet áser aldym. Osy kezdesýden keıin jigerlenip, Dýbaıda ótetin Jıý-jıtsýdan halyqaralyq jarysqa attandym», - dep jazdy Jibek Instagram paraqshasynda.