Jazasyn ótep, abaqtyda otyrǵan er adam aýrý balasyna búıregin bergen
QAJ komıteti Medısınalyq qamtamasyz etý bóliminiń qyzmetkeri Gúljan Musabaeva penıtensıarlyq júıeniń tarıhynda birinshi ret bolǵan búırek transplantasıasy týraly aıtty, dep habarlaıdy almaty-akshamy.kz Polisa.kz silteme jasap.
Ol jumys barysynda sottalǵandar men olardyń týystarynyń da kóptegen ótinishin qaraıdy. Máselen, 2018 jyldyń sáýir aıynda Komıtetke jazasyn ótep jatqandardyń biriniń jubaıy shuǵyl túrde búırek transplantasıasyn qajet etetin tórt jasar ulyna donor kerek ekenin aıtyp, hat jazǵan.
Gúljan Musabaevanyń aıtýynsha, ol ýaqytta balanyń týǵan ákesi Shyǵys Qazaqstan oblysy boıynsha QAJ departamentine qarasty ortasha qaýipsiz mekemede jazasyn ótep jatty.
«Balanyń múshkil hálin eskerip, biz dereý jazasyn ótep jatqan er adamdy tıisti saraptamalardan ótkizdik. Bizge Ana men bala ulttyq ǵylymı ortalyǵy kómektesti. Sottalýshyny astanaǵa jetkizýge jazasyn ótep jatqan mekemeniń jáne QAJ komıteti qyzmetkerleri kómektesti. Ákesi balasyna búıregin berdi. Ota sátti ótti. Sottalǵan er adamdy jazasyn odan ári óteý úshin kolonıaǵa qaıta ákeldik, – dedi Musabaeva.
Bir búıregin balasyna bergen er adam jazasyn ótep, byltyr bostandyqqa shyqty.