2-5 jeltoqsan aralyǵynda Ázerbaıjan Respýblıkasynda Qazaqstan Respýblıkasynyń Mádenıet kúnderi ótýde.
Buǵan deıin Ázerbaıjan prezıdenti Ilham Álıevtiń Qazaqstanǵa resmı sapary barysynda Memleket basshysy Qasym-Jomart Toqaev mádenıet salasyndaǵy ózara is-qımyl jáne qazaq-ázerbaıjan qarym-qatynastaryn nyǵaıtýda erekshe ról atqaratynyn atap ótken bolatyn. Sondaı-aq, issapar barysynda eki eldiń mádenıet kúnderin ótkizý týraly kelisimge qol qoıyldy, dep habarlaıdy Almaty-akshamy.kz.
Baký qalasynda bastalǵan is-sharalar halyqtardy jaqyndastyryp, olardyń tereń tarıhy men baı mádenıetin pash etedi.
Mádenıet kúnderi aıasynda búgin «HasSak» fólklorly-etnografıalyq ansambliniń jeke konserti ótti. Shyǵarmashylyq ujym sońǵy 10 jyl ishinde qazaqtyń dástúrli mýzykasynyń qaıtalanbas janrlaryn zaman aǵymyna saı jańǵyrtyp, ulttyq aspaptarda oryndaý arqyly dástúrli ónerdi dáriptep keledi.
Sondaı-aq, Baký qalasynyń turǵyndary men qonaqtary Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynyń «Qaragóz» qoıylymyn tamashalaı alady.
Negizgi is-sharalar 4 jeltoqsanǵa josparlanyp otyr. Bul kúni QR Mádenıet jáne aqparat mınıstri Aıda Balaevanyń qatysýymen Qazaqstannyń beıneleý óneri kórmesiniń ashylý saltanaty ótedi. Kórmede ártúrli janrlar men stılderde jumys isteıtin qazaqstandyq sýretshilerdiń 46 biregeı týyndysy qoıylady. Qylqalam sheberleriniń árbir jumysy – qazaq óneri men mádenıetine jańasha kózqarasty kórsetedi.
Mádenıet kúnderin Qazaqstan óner maıtalmandarynyń gala-konserti qorytyndylaıdy. İs-sharaǵa Qazaqstannyń Eńbek Eri Roza Rymbaeva, «Qurmet» ordeniniń ıegeri Zarına Altynbaeva, Qazaqstannyń eńbek sińirgen qaıratkerleri: Álisher Karımov, Medet Chotabaev, Áıgerim Beketaeva, «IL Canto», «Violas», «T&Y» toptary men «Ulytaý», «Sazgen sazy» jáne «Saltanat» memlekettik bı ansambli, sondaı-aq, «Fıkret Amırov atyndaǵy Ázerbaıjan memlekettik án-bı ansambli» qatysady.
Aıta keteıik, 2024 jyly Qazaqstanda Ázerbaıjannyń mádenıet kúnderin ótkizý josparlanyp otyr.