Ǵalymdar bul aýrýdyń kútpegen sebebin anyqtady.
Scientific Reports jýrnalyna Aýstralıadaǵy Grıffıt ýnıversıtetiniń ǵalymdary bakterıalardyń muryn tinderiniń zaqymdanýy arqyly mıǵa enip, Alsgeımer aýrýyna tán prosesterdi qalaı iske qosatynyn jarıalady, - dep habarlaıdy aqshamnews.kz Gazeta.Ru-ǵa silteme jasap.
Tyshqandarǵa júrgizilgen eksperımentter barysynda ǵalymdar Chlamydia pneumoniae bakterıasynyń pnevmonıa týdyrýy múmkin ekenin jáne onyń mıǵa ıis sezý júıkesi arqyly enetinin anyqtady. Bul proses muryn qýysynyń tinderi zaqymdanǵanda kúsheıe túsedi.
Infeksıaǵa jaýap retinde tyshqandardyń mıynda Alsgeımer aýrýyna tán amıloıd-beta aqýyzdary jınala bastaǵan. Zertteý janýarlarǵa júrgizilse de, onyń nátıjeleri adamdar úshin qaýipti bolýy múmkin degen alańdaýshylyq týdyrady.
"Chlamydia pneumoniae bakterıasynyń muryn qýysy arqyly tikeleı mıǵa enip, Alsgeımer aýrýynyń belgilerine uqsas patologıalyq ózgerister týdyrýy múmkin ekenin alǵash ret dáleldedik", – dedi zertteý avtorlarynyń biri doktor Djeıms Sent-Djon.
Ǵalymdar adamdarǵa muryndy shuqymaýdy jáne muryn túkterin julyp almaýdy usynady, óıtkeni bul ádetter murynnyń qorǵanys tinderin zaqymdaýy múmkin.
Olardyń pikirinshe, bul jańalyq bakterıalar men vırýstardyń neırodegeneratıvti aýrýlardyń damýyndaǵy rólin zertteýdiń mańyzdylyǵyn kórsetedi.