Keshe VII Baiqonyr International Short Film Festival-dyń shymyldyǵy saltanatty túrde ashyldy. «Baiqonyr» – Qazaqstandaǵy tuńǵysh halyqaralyq qysqametrajdy fılmder kınofestıvali. Ol jeti jyldan beri jas kınematografısterge qoldaý kórsetip keledi jáne Qazaqstanda ǵana emes, jaqyn jáne alys shetelderdiń ondaǵan elinde de jańa esimderdi tanytýda.
Festıvál jyldyń kópten kútken premeralarynyń biri – Ulttyq kınony qoldaý memlekettik ortalyǵynyń qarjylaı qoldaýymen Aray Media Group kompanıasy túsirgen «Dos-Muqasan» kınotýyndysymen ashyldy. Atalmysh fılmniń rejıseri – Aıdyn Sahaman.
Osy taqyrypqa oraı keshe kınogerler baspasóz máslıhatyn ótkizgen bolatyn. «Bizdiń fılmniń alǵashqy resmı kórsetilimi osyndaı keremet kınofestıvaldiń aıasynda bolatynyna qýanyshtymyz. «Baıqońyr» – bul jańa esimderdi ashatyn jáne Qazaqstannyń shyǵarmashyl jastaryna qoldaý kórsetetin festıvál. Biz úshin bul óte mańyzdy. Sebebi, «Dos-Muqasan» tobynyń shyǵarmashylyǵy da stýdent kezden bastaý aldy. Jastyq shaq – shyǵarmashylyq úshin tamasha kezeń jáne bizdiń fılm osy jas urpaqqa jaqsy kórsetkish bolady dep senemiz», – dep atap ótti «Dos-Muqasan» fılminiń bas prodúseri Aıgúl Baıbek.
Festıvál baǵdarlamasyna UKQMO-ǵy qoldaý kórsetken taǵy tórt fılm endi. Ulttyq baıqaýǵa Begaly Shıbikeevtiń «Qus» qysqametrajdy fılmi, al Dılshat Rahmatýllınniń «Besik jyry» týyndysy anımasıalyq baıqaýǵa qatysady. Al taǵy eki kartına konkýrstan tys baǵdarlama aıasynda kórsetiletin bolady: olar rejıser-anımator Ivan Ardashovtyń «Kenje qyz» anımasıalyq serıaly jáne Generation seksıasynda Berlın Halyqaralyq kınofestıvaliniń Gran-Prı ıegeri Farhat Sháripovtyń «Sqema» atty fılmi. Bul fılmder kórermenderge TMD elderiniń kınotanýshylary men synshylarynyń forýmy barysynda kórsetiletin bolady.
Forým seriktesteri AlmaU Medıa jáne kıno mektebi jáne Qazaqstannyń kınosynshylar qaýymdastyǵy bolyp tabylady. Olar festıvál jumysy barysynda óziniń jyl saıynǵy «Synshylar tańdaýy» syılyǵyn tabystaıdy.
– Qazaqstan kınosynshylar qaýymdastyǵy 2015 jyly quryldy. Onyń quramyna on alty otandyq kınosynshy men kınotanýshy kiredi. Bıyl «Synshylar tańdaýy» syılyǵy 2020-2021 jyldary shyǵarylǵan qazaqstandyq fılmderge 13 nomınasıa boıynsha beriledi, sebebi pandemıaǵa baılanysty syılyq bir jyl berilmedi, – deıdi qaýymdastyq prezıdenti, ónertaný doktory Gúlnar Ábikeeva.
Festıváldiń konkýrstyq baǵdarlamasyna qatysýǵa barlyǵy 306 kınojoba úmitker boldy. Onyń ishinde baǵdarlamalyq qyzmet jeti elden: Qazaqstan, Ózbekstan, Qyrǵyzstan, Ázerbaıjan, Tájikstan, Armenıa jáne Reseıden 48 fılmdi iriktep aldy. Úsh konkýrsta – halyqaralyq, ulttyq jáne anımasıalyq baıqaýlarda usynylǵan kartınalardy bedeldi kınoekspertterden quralǵan qazylar alqasynyń úsh komandasy baǵalaıtyn bolady. Halyqaralyq baıqaýdyń qazylar alqasyn Gúlnar Ábikeeva basqarady. Ulttyq baıqaýdyń qazylar alqasynyń tóraǵasy Saha respýblıkasynyń tanymal rejıseri Edýard Novıkov. Al Anımasıalyq baıqaýdyń qazylar alqasynyń jumysyn Batýmıdegi (Grýzıa) Tofuzi Halyqaralyq anımasıa festıvaliniń dırektory Zýrab Dıasamıdze basqarady.
– Bıyl festıvál baǵdarlamasyna biz ataqty kınotanýshylardyń dáristeri men belgili rejıserdiń sheberlik sabaǵyn engizdik. Bizdiń sarapshylar kún saıyn baıqaý baǵdarlamasynyń fılmderin, sondaı-aq konkýrstan tys kórsetetin fılmderdi, mysaly, «Qantar» arnaıy baǵdarlamasyna engizilgen týyndylardy talqylaıdy, – deıdi kınofestıval prezıdenti Ánýar Kenjebaev. Sondaı-aq, festıválge osy jyly Qyrǵyzstannan «Ekspedısıa» qozǵalysynyń ókilderi keledi. Bul qozǵalys óz eliniń búgingi ómiri týraly qysqa metrajdy fılmder túsiretin 50-ge jýyq rejıserdi biriktiredi.
«Baıqońyr» 11 qyrkúıekte Dárejan Ómirbaevtyń «Sońǵy seans» atty fılminiń kórsetilimimen aıaqtalady. Onyń álemdik premerasy Lokarnodaǵy (Shveısarıa) 75-shi mereıtoılyq festıválde ótti.
Dástúrli túrde Baiqonyr festıvaliniń uıymdastyrýshysy elimizdiń jetekshi kınoportaly – «Brodveı» (brod.kz). Festıvál TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń qoldaýymen ótedi. Aqparattyq qoldaýdy «Kazakh Tourism» ulttyq kompanıasy» AQ kórsetedi.
Festıváldiń aqparattyq seriktesteri – «Habar» jáne El Arna telearnalary, «Juldyz FM» jáne «Eldoradıo Almaty» radıostansıalary, Tengrinews.kz, Massaget.kz, Baribar.kz, 365 Info.kz, «Ekspress K» ınternet portaldary, Egemen Qazaqstan, «Kazahstanskaıa pravda», Almaty Aqshamy, «Vechernıı Almaty» jáne «Komsomolskaıa pravda Kazahstan» basylymdary.