Pavlodar oblysyna qarasty Baıanaýyl aýylynyń 59 jastaǵy turǵyny tańerteń ózin nashar sezinip, qatty basy aýyryp, qusý jáne esinen taný belgileri baıqalǵan.
Týystary dereý jedel járdem shaqyrdy. Shaqyrtylǵan jedel medısınalyq kómek brıgadasy onyń qan qysymynyń tym joǵary ekenin anyqtady. Pasıent jaǵdaıynyń aýyrlyǵyna baılanysty ol sanıtarıalyq avıasıa arqyly shuǵyl túrde Kardıoortalyqtyń qabyldaý bólimine jetkizildi.
Aýrýhanada mıdyń KT júrgizilip, sýbarahnoıdaldi qan quıylǵany jáne mıdyń mańdaı bóligi aımaǵynda úlken aralyq gematomanyń paıda bolǵany anyqtaldy. Jedel túrde neırohırýrgtiń keńesimen 3D rekonstrýksıasy bar angıografıa jasaý týraly sheshim qabyldandy.
Zertteý kezinde aldyńǵy biriktirýshi arterıada keń negizdi, eki qosymsha dıvertıkýly bar jarylǵan qapshyq tárizdi anevrızma anyqtaldy. Anevrızmanyń kúmbezi ishki medıaldy baǵytta ornalasqan. Sonymen qatar, eki ishki uıqy arterıasynda ıilis (kınkıng) baıqaldy, alaıda aldyńǵy biriktirýshi arterıa qalypty jumys istep turdy.
Ómirlik kórsetilimderi boıynsha rentgenendovaskýlárlyq operasıa jasaldy – anevrızma arnaıy mıkrokatýshkalarmen (mıkrospıraldarmen) tolyq embolızasıalandy. Operasıa sátti ótti, anevrızmanyń búkil qýysy senimdi túrde jabyldy.
Pasıenttiń jaǵdaıy aýyr kúıde qalyp, 9 kún boıy reanımasıa bólimshesinde qarqyndy em aldy.
Jaǵdaıy turaqtanǵannan keıin ol ári qaraı em qabyldaý úshin nevrologıa bólimshesine aýystyrylyp, keıin densaýlyǵy jaqsarǵan kúıde úıine shyǵaryldy.
Osyndaı patologıalar kezinde ólim deńgeıi, ásirese aýrýdyń jiti jáne erte kezeńderinde 50%-ǵa deıin jetedi. Alaıda jedel járdem brıgadasynyń ýaqtyly áreketi, sanıtarıalyq avıasıamen jedel jetkizý jáne Kardıoortalyq mamandarynyń kásibı jumysy pasıenttiń ómirin saqtap qalýǵa múmkindik berdi.
Pasıentke kórsetilgen barlyq medısınalyq kómek áleýmettik medısınalyq saqtandyrý júıesiniń sheńberinde tegin kórsetildi.