Aýyldyq jerlerde memlekettik qyzmet alýǵa bolatyn sıfrlyq núkteler ashylady
Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Jetisý oblysynyń halqymen kezdesip, turǵyndardy tolǵandyrǵan suraqtarǵa jaýap berdi, vedomstvonyń qyzmeti men jobalary týraly keńinen baıandady, dep habarlaıdy Almaty-akshamy.kz.
Óńirge sapary barysynda sıfrlyq damý mınıstri Densaýlyq saqtaý vıse-mınıstri Beıbit Esenbaevpen birge Kóksý aýdany Balpyq bı aýylyndaǵy aýdandyq ortalyq aýrýhananda boldy. Nysandy aralap, ondaǵy dárigerler qoldanatyn aqparattyq júıelermen tanysty. Medısına mamandary aqparattyq júıelerdi qoldanýdaǵy áserlerin bólisip, jumysty odan ár jetildirý jónindegi óz oılaryn aıtty.
«Zamanaýı qosymshalar pasıentke qamqorlyq jasaýǵa járdemshi bolýy kerek, densaýlyq jaǵdaıy týraly jáne basqa da qajetti málimetterdi esine salyp, oǵan habarlama joldap otyrýy kerek. Qazirgi kezde samrtfondardy qalaı qoldaný kerektigin kez kelgen adam biledi, sondyqtan qazaqstandyqtar úshin óz densaýlyǵyna qatysty qajetti degen jeke málimetterin alyp otyrý úshin óz devaısyn qoldanǵan qolaıly. Densaýlyq saqtaý mınıstrligi osyny iske asyrý máselesin baqylaýǵa alýy tıis», - dedi mınıstr.
Munan soń mınıstr jergilikti HQO jumysymen tanysyp, jeke azamattar úshin qabyldaý ótkizdi.
Halyqpen kezdesýi barysynda Baǵdat Mýsın halyqqa, sonymen qatar jańa sıfrlyq keńistikte ómir súretin bolashaq urpaqqa arnalǵan jańa múmkindikter týraly aıtyp berdi.
«Osy aıda Memleket basshysy elektrondy qujattardy qaǵaz qujattarmen teń qoldanýǵa múmkindik beretin zańǵa qol qoıdy. Budan bólek elektrondy úkimetpen birikken baılanysy bar barlyq kompanıalar men memlekettik organdar klıentten qaǵaz anyqtamalar suraýǵa quqy joq», - dedi Baǵdat Mýsın.
Sonymen birge mınıstr sıfrlyq vedomstvo mınıstri aýyldyq jerlerde turatyn azamattar úshin «Qazposhta» AQ bazasynda memlekettik qyzmet alýǵa bolatyn sıfrlyq núkteler ashylatynyn da aıtty. Endigi jerde kompúteri nemese ınterneti joq aýyl turǵyndarynyń aýdan ortalyǵyna nemese qalaǵa shyqpaı-aq sıfrlyq núkteler arqyly qyzmet alýǵa, memlekettik organdarǵa elektrondy ótinishter jiberýge múmkindigi bar.
Sondaı-aq turǵyndardy sapaly baılanys jáne ınternet jelisin berý kezdesýde talqylanǵan ózekti máselelerdiń biri boldy.
Kezdesýge telekomýnıkasıa komıtetiniń, baılanys operatorlarynyń ókilderi de qatysyp, kópshiliktiń suraqtaryna jaýap berip, týyndaǵan máselelerdi sheshýdiń joldaryn qarastyratyndaryn aıtty.
Sol sıaqty mınıstr óńirdegi jer resýrstarynyń tıimdi qoldanylýyna ǵaryshtan monıtrıng jasaýdyń nátıjelerine qysqasha toqtaldy. Máselen, 2022 jyldyń 1 jartysynda Jetisý oblysy aýmaǵynda 21 224,6 ga egistik jerdiń paıdalanylmaı jatqany, 6 973 ga egistik jerdiń maqsatty paıdalanylmaıtyny anyqtalǵan.
Oǵan qosa 2022 jyly Jetisý oblysy aýmaǵynda 134 ruqsat etilmegen qoqys nysany bar ekeni, ruqsat etilgen 22 qoqys kómý polıgonynyń 14-i belgilengen shekarany buzǵany anyqtaldy. Sondaı-aq paıdaly qazbalardy zańsyz paıdalanyp otyrǵan 44 oryn belgili boldy, sonyń 4-eýi – aýmaǵy ózgertilgen, 40-y – aýmaǵy ózgertilmegen tarıhı oryn.
Tótenshe jaǵdaılardy aldyn ala eskertýge, óz betimen basyp alynǵan aýmaqtar men orman-toǵaılardy zańsyz kesý oshaqtaryn anyqtaýǵa múmkindik bar.
Jumys saparynyń sońynda Baǵdat Mýsın Jetisý oblysynyń ákimi Beıbit Isabaevpen kezdesip, sıfrlandyrý salasyndaǵy óńirdi damytý jónindegi ózekti máselelerdi talqylady.
Óz kezeginde mınıstr Mınıstrlik Jetisý óńirimen oblysta IT-mamandardy daıarlaý, óńirdiń memlekettik mekemeleriniń biryńǵaı aqparattyq bazasyn qalyptastyrý, ǵaryshtyq monıtorıń baǵyttary boıynsha birlesken jobalardy iske asyrýǵa daıyn ekenin atap ótti.