Polısıa qyzmeti jol qozǵalysy erejelerin qatań saqtaýǵa shaqyrady. Baǵdarshamnyń qyzyl túsine toqtaý — bárimizge málim qarapaıym talap. Alaıda bul erejege baǵynbaı, joldy kesip ótetin keıbir júrgizýshiler óz ómirin ǵana emes, aınalasyndaǵy adamdardyń da ómirin qaterge tigedi.
Jýyrda Lermontov pen Buqar jyraý kósheleriniń qıylysynda patrúldik qyzmet júrgizý kezinde Audi-80 avtokóliginiń júrgizýshisi baǵdarshamnyń tyıym salynǵan sıgnalyna qaramastan joldy kesip ótkeni anyqtaldy. Polısıa atalǵan quqyqbuzýshyǵa zań aıasynda tıisti shara qoldandy.
Ókinishke qaraı, mundaı jaǵdaılar sırek emes. Keıbir júrgizýshiler jol qozǵalysy erejelerine salǵyrt qarap, óz áreketiniń saldaryn eskere bermeıdi. 2025 jyldyń ózinde ǵana 1265 júrgizýshi baǵdarshamnyń qyzyl jaryǵyna toqtamaı, jaýapkershilikke tartylǵan.
Polısıanyń basty maqsaty — azamattardyń ómiri men densaýlyǵyn qorǵaý, qoǵamdyq qaýipsizdikti qamtamasyz etý jáne múlikti saqtaý. Osyǵan oraı tártip saqshylary barlyq júrgizýshilerge úndeý joldaıdy:
«Jolda qansha asyqsańyz da, ereje men tártipti saqtańyz. Bir sáttik jaýapsyzdyq orny tolmas ókinishke ákelýi múmkin!»