Aldymyzda kele jatqan úlken mereke qarsańynda áleýmettik mańyzy bar azyq-túlik ónimderi baǵasynyń ósýine jol berilmeý kerek.
Almaty qalasy ákiminiń orynbasary Maqsat Qıqymovtyń tóraǵalyǵymen, kúndelikti kóp tutynylatyn azyq-túlik ónimderin satatyn iri saýda jelileri men dúkenderdiń («Magným», «Small», «Toımart», «Carefood», «Metro», «Stolıchnyı», «Iýbıleınyı», «Dastarhan fýd» jáne t.b.) ókilderimen ótken keńeste osy másele talqylandy.
Jıyn qorytyndysy boıynsha Almaty qalasynyń Kásipkerlik jáne ınvestısıalar basqarmasy, «Almaty «ÁKK» AQ jáne kásipkerlik sýbektileri arasynda qant pen jumyrtqa jetkizý jóninde memorandýmdar jasaldy. Búgingi tańda tikeleı jetkizilimderdi uıymdastyrý esebinen «Stolıchnyı», «Iýbıleınyı», «Dastarhan fýd» dúkenderinde qant baǵasynyń 324 teńgeden 287 teńgege deıin, «Small», «Metro», «Carefood», «Toımart» dúkenderinde 320 teńgeden 280 teńgege deıin tómendeýi qamtamasyz etildi.
Jumyrtqa (1-shi sanattaǵy) jetkizýdi uıymdastyrýdyń nátıjesinde «Stolıchnyı», «Iýbıleınyı» dúkenderinde baǵalar 480 teńgeden 420 teńgege deıin, «Carefood» jelisinde 440 teńgege deıin tómendedi. Qalanyń iri bazarlaryndaǵy «Áleýmettik dúkenderde» baǵany turaqtandyrý úshin kartop baǵasy 111 teńgege deıin, al sábiz 120 teńgege deıin tómendedi. «Toımart» saýda jelisinde kartop baǵasy 199 teńgeden 179 teńgege deıin arzandady. Sondaı-aq, bıyl jyldyń sońyna deıin «JLC» jelisinde sút pen aıran baǵasyn 3 teńgege (250 teńgeden 247 teńgege deıin) tómendetý boıynsha kelisimge qol jetkizildi.
Osy oraıda aıta ketsek, Almatyda áleýmettik mańyzy bar azyq-túlik taýarlary baǵasynyń ósýine jol bermeý jónindegi keńester apta saıyn ótkiziledi.