Almatyda ákimdik pen Sybaılas jemqorlyqqa qarsy is-qımyl agenttiginiń birlesken jumysynyń nátıjesinde mektep asqanalary úshin joǵary baǵamen memlekettik satyp alý toqtatyldy
Naýryzbaı aýdanynyń turǵyndarymen kezdesý barysynda mektep asqanalaryna arnalǵan jabdyqtardy satyp alý týraly suraqqa jaýap bere otyryp, Almaty ákimi Erbolat Dosaev QR Sybaılas jemqorlyqqa qarsy is-qımyl agenttigimen birlesken qala ákimdiginiń jumysy aıasynda búdjet qarajatyn utymsyz jumsaýǵa jol berilmegenin habarlady.
«Bul tergeý nátıjesinde emes, prevensıa aıasynda ákimdik pen Antıkordyń birlesken jumysynyń arqasynda anyqtaldy. Tekserýden keıin 20 mekteptiń jabdyqtaryn satyp alý toqtatyldy», - dedi ákim ári respýblıka boıynsha osyndaı tekserýler júrgizilgenin atap ótti. 1,9 mlrd teńge kólemindegi qarajat búdjetke qaıtaryldy. Ótken jylǵa taldaý júrgizilýde, biraq asyra silteý faktileri joq.
Sonymen qatar, ákim atap ótkendeı, búginde memlekettik satyp alý salasynda usynylatyn taýarlar men qyzmetterdiń, onyń ishinde áleýmettik mańyzy bar obektilerdiń sapasyna sáıkessizdik máselesi ózekti bolyp qala beredi.
«Ókinishke oraı, qazirgi memlekettik satyp alý júıesi josyqsyz jetkizýshilerge qatysýǵa múmkindik beredi. «Baǵa men sapa» qaǵıdasy árdaıym jumys istemeıdi, ıaǵnı arzan árdaıym sapaly bola bermeıdi. Men buǵan qarsymyn. 2025 jylǵy 1 qańtardan bastap memlekettik satyp alý týraly jańa zań kúshine enedi, ol boıynsha biz jetkizýshiler men olardyń taýarlary talaptarǵa saı bolady dep kútemiz. Sondaı - aq, memlekettik satyp alýǵa qatysýshylardyń jaýapkershiligi artady», - dedi ákim.