Almaty qalasynda Ujymdyq qaýipsizdik týraly shart uıymyna múshe memleketter Ujymdyq bitimgershilik kúshteriniń áskerı qyzmetshilerin shyǵaryp saldy
Keńes Odaǵynyń Batyry, Halyq qaharmany, armıa generaly Saǵadat Nurmaǵambetov atyndaǵy Qurlyq áskerleri Áskerı ınstıtýtynyń saptyq alańynda ótken bitimgershilik kontıngentterdi shyǵaryp salý rásimine UQSHU-nyń Bas hatshysy Stanıslav Zas, Qazaqstan Respýblıkasy Qorǵanys mınıstriniń orynbasary, general-maıor Muhamedjan Talasov, Almaty qalasynyń ákimi Baqytjan Saǵyntaev qatysty, dep habarlaıdy Almaty-akshamy.kz.
UQSHU Ujymdyq bitimgershilik kúshteri tobynyń qolbasshysy, general-polkovnık Anatolıı Serdúkov barlyq jeke quramǵa batyl sheshimderi men áskerı boryshyn minsiz oryndaǵandary úshin shynaıy alǵysyn bildirdi.
Sonymen qatar, qolbasshy Qazaqstan Qorǵanys mınıstrliginiń basshylyǵyna kópultty bitimgershilik kontıngentiniń turmys-tirshiligin qamtamasyz etý máselelerin sheshýge kómekteskeni úshin rızashylyǵyn bildirdi.
Qala ákimi Baqytjan Saǵyntaev UQSHU-ǵa qatysýshy barlyq memleketter Prezıdent Q.-J. Toqaevtyń konstıtýsıalyq tártipti ornatýǵa jáne terorıstik qaýip-qaterdi jeńýge járdemdesý úshin bitimgershilik kontıngentin tartý týraly Úndeýin biraýyzdan qoldaǵanyn eske saldy.
– Bul kúnderi bitimgerler aýqymdy jumys atqardy. Birinshi kezekte mańyzdy memlekettik jáne strategıalyq obektilerdiń kúzeti men qorǵanysyn kúsheıtý boıynsha bekitilgen ýchaskelerde quqyqtyq tártipti saqtaýǵa kómek kórsetildi. Munyń bári Almatydaǵy jaǵdaıdy turaqtandyrýda úlken ról atqardy, – dep atap ótti B. Saǵyntaev.
Qala ákiminiń aıtýynsha, búginde qalanyń tynys-tirshiliginiń barlyq salalaryn qalpyna keltirý jumystary qarqyndy júrgizilýde.
Qazaqstan Respýblıkasy Qorǵanys mınıstriniń orynbasary, general-maıor Muhamedjan Talasov Qarýly Kúshterdiń Joǵarǵy Bas qolbasshysy – el Prezıdenti Qasym-Jomart Kemeluly Toqaev uıymǵa múshe memleketterdiń basshylaryna eldegi jaǵdaıdy turaqtandyrýǵa járdemdesý úshin Birikken bitimgershilik kontıngentin engizý týraly ótinish jasaǵanyn atap ótti.
– Sizder strategıalyq jáne basqa da mańyzy bar nysandardy kúzetýdi qamtamasyz ettińizder. Bitimgershilik kontıngent kelip qazaqstandyq áskerı qyzmetshiler, ishki ister qyzmetkerleri sodyrlardy izdestirý jáne ustaý boıynsha ózderiniń tikeleı mindetterine kirise aldy, – dedi M. Talasov.
Qazaqstan Qorǵanys mınıstriniń atynan Ujymdyq bitimgershilik kúshteri kontıngentiniń áskerı qyzmetshilerine alǵys bildirildi.
Birqatar bitimgerler QR Qorǵanys mınıstriniń buıryǵymen «Halyqaralyq yntymaqtastyqqa qosqan úlesi úshin» medaldarymen jáne gramotalarmen marapattaldy.
Ujymdyq Qaýipsizdik Keńesiniń sheshimine sáıkes, UQSHU Ujymdyq bitimgershilik kúshteri Qazaqstan Respýblıkasynda memlekettik, áskerı jáne áleýmettik mańyzy bar nysandardy kúzetý jónindegi mindetterdi oryndady.
Dostyq jáne áskerı yntymaqtastyq qaǵıdattaryn basshylyqqa ala otyryp, konstıtýsıalyq tártipti qalpyna keltirý boıynsha baýyrlastyq kómek retinde Armenıa Respýblıkasy, Belarýs Respýblıkasy, Qyrǵyzstan Respýblıkasy, Reseı Federasıasy men Tájikstan Respýblıkasy el aýmaǵyna ózderiniń sany 2 030 adam men 250 birlik tehnıkany quraıtyn áskerı kontıgentterin jiberdi.
Uıym boıynsha odaqtastar terorıstik shabýyl kezinde Qazaqstanǵa qoldaý jáne ýaqtyly kómek kórsetti. Bitimgerlerdiń mańyzdy nysandardy kúzetke alýy Qarýly Kúshterdiń, quqyq qorǵaý organdarynyń kúshteri men quraldarynyń edáýir bóligin bosatýǵa jáne olardy terrorısterge qarsy kúreske jiberýge múmkindik berdi.
Osyndaı jaǵdaıda Ujymdyq qaýipsizdik týraly shart uıymynyń tıimdiligi aıqyn kórindi.
UQSHU Birikken bitimgershilik kontıngentin elden kezeń-kezeńimen shyǵarý, Qazaqstan Prezıdenti belgilegen merzimge sáıkes, bıyl 13 qańtardan bastap júzege asyrylady.