Saýda jáne ıntegrasıa birinshi vıse-mınıstri Arman Shaqqalıev arzan azyq-túlikti qaıdan alýǵa bolatynyn aıtty, dep habarlaıdy Almaty-akshamy.kz.
Onyń aıtýynsha, ol úshin eń aldymen baqylaý-kassalyq apparattarymen jabdyqtalǵan iri saýda jelilerine barǵan jón.
«Sebebi, baǵaǵa qatysty kúmán týyndaǵan jaǵdaıda, tek chek arqyly ýákiletti organdar men saýda departamentine júgine alady. Osylaısha, baǵany ósirý faktisin rastaýǵa nemese joqqa shyǵarýǵa bolady. Órkenıetti saýda formaty boıynsha taýarlardy satyp alý oryndary óte mańyzdy. Bul áleýmettik mańyzy bar taýarlarǵa da qatysty», - dedi vıse-mınıstr Ortalyq komýnıkasıalar qyzmetindegi brıfıńte.
Sondaı-aq, A. Shaqqalıev elimizde keıbir azyq-túlik baǵasy tómendegenin aıtty.
«Sońǵy aptadaǵy derekterdi taldaý nátıjesi keıbir azyq-túlik baǵasynyń túskenin kórsetip otyr. Qaraqumyq, qant, kartop, kúnbaǵys maıynyń baǵasy tómendedi. Jalpy, elimiz boıynsha 0,7-den 2,2%-ǵa deıin arzandaý baıqalady. Eger biz taýar nomenklatýrasy boıynsha basqa toptaǵy taýarlar týraly aıtar bolsaq, árıne, barlyq jerde baǵanyń tómendeýi joq. Biraq, ósý bar», - deıdi ol.
Aıta keteıik, 19 sáýirde Úkimettiń keńeıtilgen otyrysynda Prezıdent Toqaev elimizde ınflásıa sońǵy 15 jylda bolmaǵan deńgeıge jetkenin aıtyp, Úkimet músheleriniń baǵany ustap turýǵa baǵyttalǵan qadamdarynan esh nátıje joǵyn málimdedi.
«Jurttyń aı saıyn jumsaıtyn qarjysynyń teń jartysynan kóbi azyq-túlik alýǵa ketedi. Úkimettiń áreketi jetkiliksiz bolyp otyr. Tyıym salý jáne shekteý sharalary ýaqytsha ǵana áser etedi. Mundaı qadamdar qıyndyqtyń betin qaıtarsa da, odan birjola qutylýǵa múmkindik bermeıdi, tipti, máseleni ýshyqtyrady deýge bolady», – dedi Memleket basshysy.
Sondaı-aq, kúni keshe Májilis depýtaty Elnur Beısenbaev halyqtyń ortasha tabysy men qymbatshylyq jaıly resmı statısıka shyndyqqa saı kelmeıtinin aıtty.