Almaty oblysynyń óndirýshilerimen Almaty qalasyna azyq-túlik ónimderin jetkizý týraly memorandýmdarǵa qol qoıyldy.
Almaty oblysynyń iri saýda jelileri men taýar óndirýshileri Almatyǵa sıyr etin, kúnbaǵys maıyn jáne kúrishti tikeleı jetkizý týraly kelisti. Almaty qalasy ákiminiń orynbasary Maqsat Kıkımovtyń Almaty oblysyna jumys sapary barysynda yntymaqtastyq týraly tıisti memorandýmdarǵa qol qoıyldy, dep habarlaıdy Almaty-akshamy.kz Almaty qalasy ákimdigine silteme jasap.
Almaty qalasynyń kásipkerlik jáne ınvestısıalar basqarmasy, «Almaty» ÁKK» AQ, «Jetisý» ÁKK «RIR» AQ, «Magnum Cash&Carry», «Small» saýda jelileriniń ókilderi quramyndaǵy delegasıa Taldyqorǵan qalasy men Balqash aýdanynyń «Jetisý Majıko» agrokesheni» JSHS, «Dınara Ranch» JSHS, «Agrofırma Birlik» JSHS, «Tamshy-bulaq» JSHS kásiporyndary men iri sharýa qojalyqtaryna bardy, onda áleýmettik mańyzy bar azyq-túlik taýarlaryn belgilengen baǵamen jetkizý týraly kelisimder jasaldy.
Bul sharalar Memleket basshysynyń áleýmettik mańyzy bar azyq-túlik taýarlarynyń baǵasyn turaqtandyrý jónindegi tapsyrmasyn iske asyrýǵa arnalǵan. Kezdesý barysynda Almaty oblysynyń taýar óndirýshilerine memlekettik qoldaý tetikteri, atap aıtqanda, óndiriletin ónimniń ózindik qunyn tómendetýge jáne halyq úshin taýarlardyń qoljetimdiligin arttyrýǵa tıis aınalym qarajatyn tolyqtyrýǵa arnalǵan jeńildikti nesıeler usynyldy.
«Almaty qalasynyń ákimi Baqytjan Saǵyntaevtyń tapsyrmasy boıynsha megapolıstiń azyq-túlik qaýipsizdigin qamtamasyz etý jumystary belsendi túrde jalǵasýda. Bul - erekshe baqylaýda turǵan strategıalyq mańyzdy másele. Maýsym aıynda biz kókónis, qant, sút jáne sút ónimderin, qus etin, jumyrtqa, makaron ónimderin tikeleı jetkizý boıynsha kelisimder jasastyq. Búgin biz sıyr etin, maı men kúrishti tikeleı jetkizý týraly kelisimge keldik. Qabyldanǵan sharalardyń arqasynda shilde aıynyń basynan bastap tutyný baǵalary ındeksiniń 0,7% - ǵa tómendeýi baıqaldy, bul respýblıka boıynsha Almaty qalasyn 9 tarmaqqa, 10-nan 19-shy orynǵa tómendetýge múmkindik berdi», - dep habarlady Almaty qalasy ákiminiń orynbasary Maqsat Kıkımov.
Áleýmettik mańyzy bar azyq-túlik (ÁMAT) ónimderiniń baǵasyn turaqtandyrý úshin Almatynyń 7 negizgi azyq-túlik bazarlarynda áleýmettik dúkender (Kók bazar, Jańa Aqbulaq (kóterme saýda), Sary-Arqa, Tastaq, Taýsamaly, Almaty-1, Túrksib jármeńkesi) jumys isteıdi, onda ortasha naryqtyq baǵadan tómen baǵamen 10 túrli ÁMAT (kartop, sábiz, pıaz, qyryqqabat, qant, qaraqumyq, kúnbaǵys maıy, kúrish, rojkı, un) satylady. Aldaǵy maýsymaralyq kezeńge (2021 jylǵy qyrkúıekten 2022 jylǵy sáýirge deıin) Almaty ákimdigi 22 myń tonna kókónisti shuǵyl túrde satyp alý shartyn jasady.