Saýda mınıstrligi bul jaǵdaıǵa túsinikteme berdi.
Azyq-túlik baǵasyn kóterme satýshylar alypsatarlyq jolmen arttyrǵan, dep habarlaıdy Almaty-akshamy.kz QR Saýda jáne ıntegrasıa mınıstrligine silteme jasap.
Mınıstrlik áleýmettik mańyzy bar azyq-túlik baǵasynyń ósýine jol bermeý jumystary jalǵasyp jatqanyn málimdedi.
Vedomstvonyń málimetinshe, Qazaqstan ózin azyq-túlik taýarlarymen tolyqtaı derlik qamtamasyz etedi. Áleýmettik mańyzy bar azyq-túlik taýarlarynyń, sonyń ishinde ımportqa táýeldi pozısıalardyń (qant, taýyq eti, súzbe) aıtarlyqtaı qory bar.
«Turaqtandyrý qorlarynda 27,4 myń tonna áleýmettik mańyzy bar azyq-túlik taýarlary saqtaýly tur. Onyń ishinde un, qant, makaron, kúrish jáne taǵy basqa kókónis ónimderin jetkizýge forvardtyq kelisimsharttar jasaldy», - delingen habarlamada.
24 aqpandaǵy jaǵdaı boıynsha turaqtandyrý qorlarynda 27,4 myń tonna azyq-túlik, onyń ishinde 11,5 myń tonna un, 3,8 myń tonna qant, 1,5 myń tonna makaron, 0,8 myń tonna kúrish saqtalǵan. Shamamen 124,5 myń tonna áleýmettik mańyzy bar azyq-túlik taýarlaryn, onyń ishinde 45,7 myń tonna kartop, 12,5 myń tonna pıaz, 13,2 myń tonna sábizdi jetkizýge forvardtyq sharttar jasaldy.
Saýda jelileri odaǵynyń derekteri boıynsha, rıteılerler áleýmettik mańyzy bar azyq-túlik taýarlarynyń qorymen kem degende 30 kúnge qamtamasyz etilgen. Bul qorlar qol qoıylǵan kelisimsharttar esebinen, onyń ishinde aınalym sqemasy sheńberinde qalyptasady. Iaǵnı, taýarlar eń tómengi saýda ústemesimen belgilengen baǵamen satylady.
«Úı janyndaǵy dúkenderde baǵany kóterý faktileri baıqalady. Ol kóterme satýshylardyń azyq-túlik baǵasyn alyp-satarlyq jolmen arttyrý jaǵdaılarymen baılanysty. Alyp-satarlyqtyń aldyn alý úshin ákimdikter qazir saýda-sattyqqa qatysýshylarmen jumys júrgizip jatyr», - dep atap ótti mınıstrlik qyzmetkerleri.
Saýda ústemeleri men retro-bonýstardy ákimshilendirýdi jáne memlekettik baqylaýdy kúsheıtý, sondaı-aq shekti baǵalardy ýaqtyly engizý arqyly baǵanyń ósýine jol bermeý jumystary jalǵasyp jatyr.
Ákimdikter tarapynan 15%-ten aspaıtyn mólsherde saýda ústemesi mólsheriniń saqtalýyna jáne saýda jelileriniń syıaqy alýyna jol bermeýge kúsheıtilgen monıtorıń pen baqylaý júrgiziledi.
Osy baǵyt boıynsha árbir saýda núktesin baqylaý úshin jurtshylyq tartylady.
Eldiń azyq-túlik qaýipsizdigin qamtamasyz etý boıynsha 2024 jylǵa deıingi jospar ázirlendi.
Osy jospardy iske asyrý aıasynda óz óndirisi esebinen ishki tutynýdy 100% qamtamasyz etýge qol jetkizý josparlanyp otyr.