Almatyda «Tamasha» ázil-syqaq teatrynyń 45 jyldyq mereıtoıyna arnalǵan saltanatty konsert ótti. 1978 jyly qurylǵan óner ujymynyń astarly ázil men tereń maǵynaǵa toly qoıylymdaryn tamashalaýǵa halyq kóp jınaldy. Teatr akterleri qoǵamdaǵy túrli keleńsizdikterdi qaljyńǵa aınaldyryp, kórermenniń júzin kúlkige bólese, al jınalǵan qaýym kópten saǵynǵan óner ıelerin uzaq shapalaqpen qurmettedi.
Kesh shymyldyǵyn teatrdyń beldi ártisteri Tuńǵyshbaı Jamanqulov pen Lıdıa Kádenova ashty. Gúlbaýshan Tileýbekova, Danagúl Temirsultanova, Asylbek Boranbaı, Marat Kókkózov, Nurjan Tutov syndy talantty akterler sahna tórinde erekshe óner kórsetip, kórermenderdi kúlkige qaryq qyldy. Sonymen qatar, bir kezderi qoıylǵan áıgili ıntermedıalaryn qaıta sahnalap, kópshilikti ótken kúnderge saıahattatty.
— «Tamasha bolady» degendi estı sala, bılet alyp, osynda keldik. Búgingi kesh óte áserli ótti. Respýblıka saraıyna jınalǵan barsha kórermen erekshe nostalgıaǵa bólendi dep oılaımyn. Akterlerdiń ónerin kórip, ertedegi jarqyn sátter kóz aldyma elestedi. Ártisterdi saǵynyp qalyppyz, — deıdi almatylyq kórermen Rázıa Qydyrbaıqyzy.
Teatrdyń mereıtoılyq keshinde Roza Rymbaeva, Aıjan Nurmaǵambetova, Ulyqpan Joldasov, Tamara Asar, Tolqyn Zabırova syndy óner juldyzdary jáne «Dos-Muqasan», «Úrker» toptary óz ónerlerin pash etip, keshtiń sánin keltirdi.
— Qazir jas ázil-syqaq teatrlary kóbeıip keledi, biraq «Tamashanyń» orny erekshe. Búgin bizdiń súıikti teatrymyz qaıta oraldy. «Tamashanyń» sahnasyn qatty saǵyndyq. Teatr uzaq jasasyn! — dedi halyq ártisi Roza Rymbaeva.
Keshke kelgen kórermender erekshe ásermen tarqasyp, teatrdyń oı salarlyq ázilderi men qaljyńdary kórermenniń júreginen oryn tapty.
Mereıtoılyq dýmandy keshtiń televızıalyq nusqasyn 31 jeltoqsan kúni «Jibek Joly» arnasynan tamashalaýǵa bolady.
Aıta keteıik, 30 qarashadan bastap «Jibek Joly» telearnasynda aty ańyzǵa aınalǵan «Tamasha» teatry týraly serıal kórsetile bastady. Bul týyndy qazaq halqynyń eń tanymal teatrynyń tarıhyna sholý jasap, mańyzdy oqıǵalardy, tanymal keıipkerlerdi jáne este qalǵan ıntermedıalar men mýzykalyq qoıylymdardy qamtıdy.