«Azıa daýysy» jáne «Jas qanat» án baıqaýlaryn ótkizý úshin «Azıa daýysy» halyqaralyq festıvali» qoǵamdyq qory Mádenıet jáne sport mınıstrligi, Almaty qalasy ákimdigimen kelissózder júrgizýde.
Bul týraly qoǵamdyq qordyń vıse-prezıdenti Temirlan Tólegenov aıtty, dep habarlaıdy Almaty-akshamy.kz.
Spıker bıyl «Azıa Daýysy halyqaralyq festıvali» qoǵamdyq qory qurylǵanyn aıtty.
«Ókinishke oraı, pandemıa kezinde Azıa daýysynyń negizin qalaýshylar Murat Erǵalıev pen Aleksandr Ponamorev qaıtys boldy. Biraq, úshinshi quryltaıshy Irına Kovyráko bizdiń kómegimizben barlyq quqyqtardy qalpyna keltirdi. Iaǵnı, bıyl «Azıa daýysy», «Jas qanat» saýda ataýy men «Azıa daýysy» logotıpine qatysty barlyq quqyqtar qalpyna keltirildi.
Sondaı-aq, bıyl «Azıa daýysy» halyqaralyq festıvali» qoǵamdyq qoryn qurdyq. Almatyda «Azıa daýysy» men «Jas qanat» án baıqaýlaryn jandandyrý úshin qazir Mádenıet jáne sport mınıstrligi, Almaty qalasy ákimdigimen kelissózder júrgizý ústindemiz. Kelesi jyly ataqty án baıqaýlary Almatyda qaıta jandanatyn bolady dep oılaımyz»,- dedi Temirlan Tólegenov.
Eske salaıyq, Almaty ákimi Erbolat Dosaev Mádenıet jáne sport mınıstrligimen birlese otyryp, «Azıa daýysy» jáne basqa da mýzykalyq festıválderdi jańǵyrtý josparda bar ekenin aıtqan bolatyn.