Óziniń jankúıerlerin 20 jyl kúttirgen festıvál týra búgin, 28 shildede Almatyda, «Medeý» muz aıdynynda shymyldyǵyn qaıta ashty, dep habarlaıdy Almaty-akshamy.kz.
Úsh kúnge jalǵasatyn mýzykalyq merekenyń ashylý saltanaty joǵary deńgeıde ótti. Mádenı sharanyń ashylýynda QR Mádenıet jáne sport mınıstri Asqat Oralov quttyqtaý sózin sóıledi.
Sondaı-aq, jobanyń basty jetekshileri ári qoldaýshylary Armanjan Baıtasov pen Úmit Shaıahmetova kórermenderdi halyqaralyq festıválmen qaıta qaýyshýymen quttyqtady.
«Mınıstr Asqat Oralov sózinde: «Elimizde mádenı-áleýmettik sharalar qashan da joǵary qoldaýǵa ıe. “Azıa daýysy” festıvali de sonyń biri desek qatelespeımiz. Óz kezeginde is-sharany uıymdastyrýshylarǵa alǵysymdy aıtqym keledi. Jalpy, daryndy jastardy qoldaýǵa maqsatynda Qazaqstanda jylyna 30-dan astam halyqaralyq festıvál ótkiziledi. Olardyń arasynda «Jibek joly opera jáne balet» festıvali, Ortalyq Azıa elderiniń teatr festıvali, «Kóshpeliler áýeni» sekildi tanymal jobalardy ataýǵa bolady. Barshańyzdy halyqaralyq mýzykalyq festıváldiń saltanatty ashylýymen quttyqtaımyn», – dedi.
Azıanyń asqaq sahnasy eń aldymen otandyq óner juldyzdaryna tıdi. Ónerpazdardyń kóshin bastap án ańyzy – Bıbigúl Tólegenova óner juldyzdaryna jáne tarıhı festıválǵa degen batasyn berdi. Keıin elimizde jáne shetelde aýqymdy aýdıtorıaǵa ıe juldyzdarymyz Moldanazar, RaiM, Erke Esmahan, V$XV PRINCE, Mıras Júginisov, Marhaba Sábı, ORYNKHAN, Irına Kaıratovna, ZAQ qatarlylar óner kórsetti.
Aıta keteıik, festıváldiń birinshi kúnine Green Case Event kompanıasy jaýapty bolyp ótkizýde.
Atalmysh, aýqymdy halyqaralyq joba 1990 jyly dál búgingi «Medeý» sporttyq kesheninde álemge óz daýysyn estirtken bolatyn. 2005 jylǵa deıin udaıy damyǵan joba álemdik mýzyka ındýstrıasyndaǵy mańyzdy oqıǵaǵa aınalǵan. Endi mine 20 jyldyq úzilisten keıin Alataý bókterinde, Almaty tórindegi óziniń tarıhı sahnasynda qaıta jańyrdy.
Jobany Halyq banki Tan Media Group medıaholdıngimen birge qaıta jandandyryp otyrǵanyn aıta keteıik. Otandyq bank óziniń 100 jyldyq mereı toıyna oraı «100 ıgi is» aýqymdy aksıasyn ótkizýde.
Shara aldaǵy kúnderde de jalǵasyn tabady. Erteń sahnaǵa álemdik juldyzdar shyǵady dep kútilýde.
