Qazaqstandyqtardyń qaryzdan qutylyp, jańa ómir bastaýyna múmkindik beretin QR-nyń «Azamattardyń tólem qabilettiligin qalpyna keltirý jáne bankrottyǵy týraly zańy» Almatyda sátimen iske asyp jatyr, dep habarlaıdy aqshamnews.kz.
Onda halyqtyń ásirese áleýmettik osal tobyna kóp kóńil bólingen. Óńirlik komýnıkasıalar qyzmetinde ótken pres-konferensıada Almatynyń Memlekettik kirister departamentiniń dármensiz boryshkerlermen jumys basqarmasynyń basshysy Aıdos Budyǵulov osylaı dedi.
«Zań ásirese tabysy az azamattar men kóp nesıe alyp, qıyn jaǵdaıǵa tap bolǵan halyqtyń áleýmettik osal tobyna kóp kóńil bólgen. Osy zańnyń arqasynda olardyń kóbi uzaq jyldar boıy aýyr júk bolyp kelgen qaryzynan qutylýǵa múmkindik alyp otyr»,- deıdi Aıdos Budyǵulov.
Sottan tys bankrottyq rásimdi qujat jınap áýre bolmaı-aq, budan bylaı onlaın arqyly rásimdeı berse bolady. Bul qaǵazbastylyqtan qatty qınalatyn qart adamdarǵa da paıdaly. Endi osynyń bárin «elektrondy úkimet» arqyly nemese mobıldi qosymsha arqyly tez ári tegin isteı alasyz.
Sot arqyly bankrot dep tabylǵan jáne tólemge qabilettiligin qaıta qalpyna keltirý máselesi odan da kúrdeli jaǵdaıdy qarastyrǵanymen, biraq ol da azamattardyń múmkindigine qaraıdy. Sońǵysy turaqty tabysy bar, sonyń ishinde zeınetaqy tólemderi bar azamattar úshin erekshe mańyzdy, olar bereshegin ýaqytyly tóleıtinderdiń mártebesinen aıyrylǵysy kelmeı, qaryzyn birtindep, kezeń-kezeńimen óteıdi.
Byltyr kúshine engen zańdaǵy jańa tolyqtyrý azamattardyń múmkindigin odan ary arttyrdy. Endi ýaqytyly tóleıtin, biraq nesıesi kóbeıip ketkender de osy múmkindikti paıdalana alady. Sonymen birge, tólemge qabilettiligin qalpyna keltirgennen keıin, shetelge shyǵýyna shekteý qoıý jaǵy da alynyp tastalady. Bul shetelde týǵan-týysy bar azamattarǵa da tıimdi bolǵaly tur.
Osylaısha, zań qaryzdan qutylyp, jańa ómir bastaǵysy kelgen qazaqstandyqtardy áleýmettik turǵyda qoldaıtyn quralǵa aınaldy.