Jetisýda taǵy bir gemodıalız ortalyǵy iske qosyldy. «Týǵan jerge týyń tik» degendeı, Sarqan aýdany Qaraýyltóbe aýylynda týyp-ósken azamattyń mesenattyq jasaýymen Sarqan aýdandyq aýrýhana bazasynda gemodıalız ortalyǵy ashyldy. Oǵan kásipker 60 mln. teńge jeke ınvestısıa salǵan, - dep habarlaıdy Jetisý oblysy ákiminiń baspasóz qyzmeti.
Sarqan aýdany ákimdiginiń málimetine qaraǵanda, kásipker Azamat Dolanbaev aýdandyq aýrýhananyń bos turǵan úı-jaıynyń shaǵyn bóligine jóndeý jumystaryn júrgizip, gemodıalız qyzmeti úshin arnaıy jabdyqtar ákelip ornatqan. Ortalyq ornalasqan alańnyń kólemi – 85,2 sharshy metr. Oryndy jalǵa alý aqysy memlekettik búdjetke tólenedi.
Osylaısha 19 myń turǵyny bar Sarqan qalasynda búırektiń sozylmaly jetkiliksizdigi aýrýyna shaldyqqan adamdardyń qanyn tazalap, qalypty ómir súrýin qamtamasyz etetin ortalyq iske kiristi. Buryn syrqattar gemodıalız alý úshin Sarqannan 151 shaqyrym jerdegi oblys ortalyǵyna qatynaıtyn bolsa, endi olarǵa alysqa jol tartýdyń qajeti joq.
Ortalyqtyń ashylýymen turǵyndardy aýdan ákimi Ǵalymjan Mamanbev quttyqtap, el jandy azamatqa alǵysyn bildirdi. Ol óz sózinde osy ýaqytqa deıin aýdanda mundaı ortalyq bolmaǵanyn, sondyqtan sozylmaly búırek aýrýlary bar azamattardyń Taldyqorǵan qalasyna barýyna týra kelgenin aıtty.
- Adam ómiri - eń qymbat qundylyq, densaýlyq eshqandaı aqshamen ólshenbeıdi. Osy rette Azamat baýyrymyzdyń ıgi isine alǵys bildiremin, - dedi Ǵ. Mamanbaev.
Ortalyqta Germanıada jasalǵan qural-jabdyqtar ornatylǵan. Munda bir mezgilde 4 naýqas em qabyldaı alady. Medısınalyq qyzmet tegin medısınalyq kómektiń kepildendirilgen kólemi aıasynda MÁMS júıesi arqyly tegin kórsetiledi.
- Emdeý prosesi ár adamǵa aptasyna 3 ret júrgiziledi. Bir seansqa shamamen 4 saǵat jumsalady. Búgingi kúnge Sarqan aýdanynan bólek Aqsý jáne Alakól aýdandarynyń jaqyn aımaqtarynyń naýqastaryn qosa alǵanda 10 azamat em alyp jatyr, - deıdi dáriger Oljas Baıjanov. Almaty qalasynyń «Bios» klınıkalyq bazasynan arnaıy bilim alǵan ol áriptesi Murat Bólegenovpen birge ortalyqta naýqastarǵa arnaıy medısınalyq kómek kórsetedi.