Bul týraly Úkimettiń baspasóz málim etti.
Bıyldan bastap energıa kózderiniń jabdyqtaryn keshendi jańǵyrtý, sondaı-aq elektr, jylý, sýmen jabdyqtaý jáne sý tartý jelileriniń tozý deńgeıin tómendetý maqsatynda «Tarıfti ınvestısıaǵa aıyrbastaý» baǵdarlamasyn iske asyrý bastaldy. Bul apattar sanyn azaıtýǵa jáne jalpy usynylatyn komýnaldyq qyzmetterdiń sapasyn arttyrýǵa múmkindik beredi, dep habarlaıdy Almaty-akshamy.kz Elorda.info-ǵa silteme jasap.
Búgingi tańda TKSH kásiporyndarynyń tarıfter men ınvestısıalyq baǵdarlamalardy ózgertýge qatysty (jóndeý jumystary men qyzmetkerlerdiń jalaqysyn kóbeıtý, qaraýsyz jatqan jelilerdi kútý jáne t.b.) 212 ótinimi bekitildi. Nátıjesinde komýnaldyq qyzmetter tarıfteriniń ózgerýi 10-30%-dy qurady, munda tutynýshylar men komýnaldyq qyzmetter múddeleriniń teńgerimi eskerilgen.
Bul rette halyqtyń áleýmettik jaǵynan az qamtylǵan toptarynyń komýnaldyq qyzmetterge jumsalatyn shyǵyndardyń bir bóligi óteletin bolady. Mundaı tetik memlekettik turǵyn úı kómegin kórsetý aıasynda kózdelip otyr.
Ol az qamtylǵan otbasylarǵa nemese azamattarǵa komýnaldyq qyzmetter (jylý, elektr jáne sýmen jabdyqtaý, baılanys, lıft qyzmeti jáne t. b.) shyǵyndaryn óteý úshin toqsan saıyn tólenedi. Basty shart – tólem alýshynyń menshiginde Qazaqstan aýmaǵynda bir ǵana baspana bolýy kerek nemese ol memlekettik turǵyn úı qorynan, jeke menshik turǵyn úı qorynan jergilikti atqarýshy organ jaldaǵan baspanany jalǵa alýshy (teń jalǵa alýshy) bolýy tıis.
Bıyl Úkimet engizgen ózgeristerge sáıkes, eger komýnaldyq qyzmetterge jumsalatyn soma otbasynyń nemese azamattyń bir aıdaǵy jıyntyq tabysynyń 10%-nan asatyn bolsa, turǵyn úı kómegi beriledi. Buryn bul kórsetkish ár óńirge baılanysty 2-20% aralyǵynda bolǵan. Bul rette ákimdikter ruqsat etilgen shekti deńgeıdi 10%-dan tómendetýge quqyly.
Mysaly, eger otbasynyń nemese azamattyń bir aıdaǵy jıyntyq tabysy 100 myń teńgeni, al komýnaldyq qyzmetterge jumsalatyn shyǵyny 15 myń teńgeni (tabystyń 10%-dan astamyn) qurasa, onda azamattyń jergilikti búdjet qarajaty esebinen ótem alýǵa quqyǵy bar.
Úkimet bekitken túzetý bolashaq turǵyn úı kómegin alýshylardy qamtýdy keńeıtýge jáne az qamtylǵan azamattarǵa qarjylyq júktemeni azaıtýǵa baǵyttalǵan.
Jalpy sońǵy 4 jylda 174 myńnan astam abonentke turǵyn úı kómegi úshin jalpy somasy 5 mlrd teńge tólendi. Al osy jyldyń 6 aıynda 31 myń otbasyna 630,5 mln teńgege kómek kórsetildi.
Osylaısha, komýnaldyq qyzmetter tarıfteri kóterilgen jaǵdaıda ótemaqy da ulǵaıady, ıaǵnı az qamtylǵan azamattardyń shyǵyndary ulǵaımaıdy.
Turǵyn úı kómegin taǵaıyndaý úshin azamattarǵa turǵylyqty jeri boıynsha ákimdikke júginý qajet.