Qazaqstan Respýblıkasy Densaýlyq saqtaý mınıstrligi Memleket basshysynyń tapsyrmasy aıasynda aýyldyq jerlerde medısınalyq kómektiń sapasy men qoljetimdiligin jaqsartý boıynsha aýqymdy sharalardy iske asyrýda, dep habarlaıdy aqshamnews.kz
Kólik medısınasy – turǵyndarǵa medısınalyq kómektiń qoljetimdiligin arttyrýdyń qarqyndy damyp kele jatqan baǵyty. Elimizdiń shalǵaı aýdandarynyń turǵyndaryna medısınalyq qyzmetterdiń qoljetimdiligin arttyrý úshin jyljymaly medısınalyq keshender (JMK) belsendi túrde jumys istep keledi.
2024 jyly 3072 eldi mekenniń 1,2 mln turǵyny «dóńgelektegi emhanalardyń» kómegimen dárigerlerdiń keńesteri men dıagnostıkalyq em-sharalardy aldy. Bul keshender arqyly beıindi mamandar 1,2 mln konsýltasıa, 656 myń dıagnostıkalyq, 333 myń zerthanalyq zertteý júrgizdi.
Qarap-tekserý barysynda ártúrli aýrýlary bar 95 myń pasıent anyqtaldy, olardyń 78,3%-y eresekter, al 21,7%-y balalar. Kásiptik tekserý nátıjesinde 33,7 myń aýyl turǵyny dıspanserlik baqylaýǵa alyndy.
"Salamatty Qazaqstan" medısınalyq poıyzy 2024 jyly 128 stansıanyń 104 myń turǵynyna, onyń ishinde 21 myń balaǵa medısınalyq qyzmet kórsetti. Bul ótken jylmen salystyrǵanda 20%-ǵa artyq. Poıyz mamandary 240 myń medısınalyq qyzmet, sonyń ishinde 12,5 myń stomatologıalyq em-shara, 25 myń zerthanalyq zertteý, 8 myń shaǵyn hırýrgıalyq operasıa jáne 24 myń aspaptyq zertteý júrgizdi.
Aýyldyq densaýlyq saqtaýdy jańǵyrtý ulttyq jobasy aıasynda aýyldyq aýdandarda medısınalyq ınfraqurylymdy júıeli jańartý jalǵasýda. 2024 jyly 460 nysannyń qurylysy aıaqtaldy, taǵy 195 nysannyń qurylysy 2025 jyly aıaqtalady.
Jańa dárigerlik ambýlatorıalar men feldsherlik-akýsherlik pýnktterde:
- Kúndizgi stasıonarlar;
- Ambýlatorıalyq ońaltý úshin fızıoterapıa kabınetteri;
- Zerthanalyq tekserý kabınetteri iske qosyldy.
Telemedısınalyq kabınetterde aýyl turǵyndary oblystyq jáne respýblıkalyq klınıkalardyń jetekshi dárigerlerinen qashyqtan konsýltasıa alý múmkindigine ıe boldy.
2025 jyly 32 aýdandyq aýrýhanany jańǵyrtý josparlanyp otyr. Olardyń bazasynda:
- Kardıologıalyq ortalyqtar;
- Travmatologıa, reanımasıa jáne hırýrgıa bólimsheleri ashylady.
Bul sharalar ınfarkt, ınsýlt jáne jaraqat jaǵdaılarynda «altyn saǵat» qaǵıdatyn saqtap, ólim kórsetkishin 20%-ǵa tómendetýge múmkindik beredi.
Medısınalyq kadrlardy tartý boıynsha jańalyqtar:
Aýyldyq jerlerde jumysqa ornalasqan jas dárigerlerge qosymsha qarjylyq yntalandyrý, turǵyn úıge jeńildikti kredıtter jáne kásibı ósý múmkindikteri beriledi.
2024 jyly óńirlerge 4148 túlek jiberildi, onyń ishinde 1233 dáriger aýyldyq jerlerge jumysqa ornalasty.
Medısınadaǵy jańa jobalar:
- "Bir kúndik klınıkalar" jobasy júkti áıelderdi prenataldyq dıagnostıkalaýdyń jańa ádisterimen qamtıdy.
- "Fetaldyq medısına" jobasy aıasynda 20 jatyrishilik operasıa sátti júrgizildi.
Bul jobalar aýyl turǵyndaryna joǵary tehnologıalyq medısınalyq kómektiń qoljetimdiligin qamtamasyz etip, densaýlyq saqtaý salasynda qala men aýyl arasyndaǵy teń jaǵdaı jasaýǵa yqpal etedi.
