«Aýyldyq densaýlyq saqtaýdy jańǵyrtý» ulttyq jobasy iske qosylady. Bul týraly Úkimet otyrysynda QR Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz Inform.kz-ke silteme jasap.
«Prezıdent 2023 jyldan bastap aýyl turǵyndarynyń medısınalyq kómekke suranysyn qanaǵattandyrýǵa arnalǵan ulttyq jobany iske asyrýdy tapsyrdy. Osy maqsatta biz «Aýyldyq densaýlyq saqtaýdy jańǵyrtý» ulttyq jobasyn iske qosý jáne iske asyrý úshin tıisti eseptemeler júrgizip, qajetti sharalardy aıqyndadyq. Ulttyq jobanyń negizgi maqsaty - barlyq aýyldyq eldi mekenderdi normatıvterge sáıkes alǵashqy medısınalyq-sanıtarlyq kómek uıymdarymen qamtamasyz etý esebinen qalalyq jáne aýyldyq densaýlyq saqtaý arasyndaǵy alshaqtyqty qysqartý, sondaı-aq aýyl turǵyndaryna shuǵyl medısınalyq kómekti ýaqtyly kórsetýdi arttyrý», - dedi ol.
Mınıstrdiń dereginshe, ulttyq joba aıasynda 655 alǵashqy medısınalyq-sanıtarlyq kómek nysany, onyń ishinde jańa 228 nysan jáne qoldanystaǵy medısınalyq-sanıtarlyq alǵashqy kómek obektileriniń ornyna 427 nysan salynady. 32 kóp beıindi ortalyq aýdandyq aýrýhanalardy uıymdastyrý, onyń ishinde qoldanystaǵy 12 aýrýhanany jetildirý qamtamasyz etiledi. Sonymen qatar «Altyn saǵat» qaǵıdatyn saqtaı otyryp, ınfarkt, ınsýlt, bosaný, jaraqattar kezinde jáne basqa jaǵdaılarda shuǵyl medısınalyq kómek kórsete alatyn, sondaı-aq iri qalalarǵa barmaı-aq, telemedısına jáne qashyqtyqtan medısınalyq qyzmetter arqyly mamandandyrylǵan jáne joǵary tehnologıalyq medısınalyq kómek kórsete alatyn jańa kóp beıindi ortalyq aýdandyq aýrýhanalar ashý qamtamasyz etiledi.
«Ulttyq jobany iske asyrý aýyl turǵyndary arasynda qan aınalymy júıesi aýrýlarynyń ólim-jitimin 23,6 paıyzǵa tómendetýge, 4 mıllıonnan astam aýyl turǵyndaryn sapaly, jedel jáne joǵary tehnologıalyq medısınalyq kómekpen qamtamasyz etýge múmkindik beredi», - dedi Ajar Ǵınıat.