Áıgili "Real Madrıdke" qarsy oıynda "Qaırat" FK-nyń qaqpasyn qorǵaǵan Sherhan Qalmurza birneshe kún ishinde jeli juldyzyna aınaldy. Nebári 18 jastaǵy jas darynnyń sheberligi men oıyndaǵy sátteri kóptiń nazaryn aýdardy. Sherhan Qalmurza jaıly siz bilmeıtin qandaı derekter bar? Sheteldik BAQ Qalmurza týraly ne dep jatyr? Aqshamnews.kz tilshisiniń materıalynan bilińiz.
Qosshynyń qara balasy Chempıondar lıgasynda
Sherhan Qalmurza Aqmola oblysyndaǵy Qosshy aýylynda týyp ósken. Fýtboldaǵy mansabyn "Qaırat" sapynda jastar lıgasynda bastady. Jastar lıgasynda eki márte chempıon atanyp, 2025 jylǵy kóktemde "Qaırat-Jastarda" turaqty oınaı bastady.
sýret: e-history.kz
Al onyń juldyzdy sáti "Qaırattyń" ekinshi qaqpashysy Temirlan Anarbekovtyń jaraqat alýymen tikeleı baılanysty. Chempıondar lıgasynyń irikteý kezeńinde "Seltıkke" qarsy machta Sherhan alańǵa shyqpaı jatyp, qazaqstandyqtar arasynda tanylyp ketken edi.
sýret: oıyn barysynan
"Qaırattyń" birinshi qaqpashysy Aleksandr Zarýskıı "Seltıkke" qarsy machta, al ekinshi qaqpashy Temirlan Anarbekov 14 qyrkúıekte "Aqtóbege" qarsy oıynda jaǵynan aýyr jaraqat alyp, qaqpany kúzetý Qalmurzaǵa buıyrdy. Osylaısha onyń Chempıondar lıgasyndaǵy "juldyzdy joly" bastaldy.
"Sportıngke" qarsy debút: penaltıdi qaıtarǵan eń jas qaqpashy
18 qyrkúıekte Lıssabonda ótken machta Sherhan alǵash ret Chempıondar lıgasynyń "lıga kezeńinde" qaqpaǵa turyp, alǵashqy taımda Morten Húlmandtyń penaltıin qaıtardy. Oıyn "Qaırat" úshin 1:4 esebimen aıaqtalǵanymen, jas qaqpashynyń sátti seıvteri kópti tańǵaldyrdy.
Jergilikti jáne sheteldik basylymdar ony týrnır tarıhyndaǵy eń jas qaqpashylardyń biri ári penaltı qaıtarǵan eń jas fýtbolshy retinde erekshe atap ótti. Tipti Chempıondar lıgasynyń resmı paraqshasynyń úzdik seıvteri tizimine enip úlgerdi.
"Real Madrıdke" qarsy tarıhı mach
30 qyrkúıekte Almaty "Ortalyq stadıonynda" "Qaırat – "Real Madrıd" kezdesýinde favorıt komanda 5:0 esebimen almatylyq klýbtan basym tústi. Degenmen, bul oıyn Qazaqstan fýtboly úshin tarıhı kezdesýge aınalyp, mach boıy Sherhan Qalmurza 7 seıv jasady. 18 jastaǵy daryn ıesi áıgili fýtbol juldyzy Kıllıan Mbappeniń birneshe soqqysyn qaıtaryp, tipti ony ábigerge salyp qoıdy. Oıynnyń 44-mınýtynda Mbappeniń Qalmurzaǵa qaraǵan kózqarasy jelidegi jurtty biraz shýlatty.
sýret: oıyn barysynan
Oıynnan keıin "Real Madrıd" qaqpashysy, áıgili Tıba Kýrtýa Sherhanmen tildesip, oıyn jeıdelerin almasty. Ol tipti óziniń jelidegi paraqshasynda qazaqstandyq qaqpashymen túsken sýretin jarıalap, keıin Qalmurza jarıalaǵan postqa pikir qaldyryp ketken.
"Osy betińnen taıma! İske sát" dep jazdy Kýrtýa.
Atalmysh oıynnan keıin Sherhan Qalmurza taǵy da úzdikter tizimine kirdi. Onyń "Realǵa" qarsy oıyndaǵy seıvterin ÝEFA ekinshi ret top tórttikke engizdi.
Qalmurza - Qazaqstandaǵy eń tanymal fýtbolshy
Koróldik klýbqa qarsy oıynnan keıin Qalmurzanyń Instagram paraqshasynda oqyrman sany 300 myńnan asty. Dál qazir ol elimizdegi eń tanymal fýtbolshylar reıtıńinde kósh bastap tur.
Qazaqstan fýtbolshylarynyń jazylýshylar sany boıynsha TOP bestik:
-
Sherhan Qalmurza ("Qaırat") — 325 myń jazylýshy;
-
Bahtıór Zaınýtdınov ("Dınamo" Máskeý) — 270 myń jazylýshy;
-
Temirlan Anarbekov ("Qaırat") — 213 myń jazylýshy;
-
Dastan Sátpaev ("Qaırat") — 187 myń jazylýshy;
-
Baýyrjan Islamhan ("Astana") — 115 myń jazylýshy.
"Bir kúni uly oıynshy atanady": Sherhan týraly sheteldikter ne deıdi?
Chempıondar lıgasy álbette álem nazarynda. Onyń ishinde "Real" oıynshylarynyń soqqysyna qarsy turǵan "Qaırattyń" 18 jastaǵy qaqpashysy týraly álem sarapshylary jarysa jazyp jatyr. Solardyń birnesheýin usynamyz:
"Sherhan Qalmurza bir kúni uly oıynshy atanady. 18 jas, 3 aıynda "Realǵa" qarsy oıynda 7 seıv jasady" dep jazdy Large Coke.
"Manchester Iýnaıted sender "Qaırattyń" 18 jastaǵy qaqpashysyn kórip otyrsyńdar degen úmittemin???" delingen Efe Mena jazbasynda.
"18 jastaǵy "Qaırat-Almaty" qaqpashysy tamasha seıvter jasap jatyr. Potensıaly bar" deıdi biri.
"Qaqpashyǵa kóbirek aqsha tóleý kerek! Kim menimen kelisedi?" deıdi rozer.
"Muny kóp eshkim aıtyp jatqan joq biraq, "Qaırattyń" 18 jastaǵy qaqpashysynyń senimdiligi unaıdy. Ýaqyt óte kele ol shyńdala túsedi. 18 jastaǵy qaqpashy úshin "Realǵa" qarsy 7 seıv keremet nátıje" dep jazdy taǵy biri.
Qalmurzanyń ózi ǵana emes, anasy men súıiktisi de el nazarynda
Sherhannyń anasy Sáýle Rabaeva da el aýzynda júr. Onyń sulýlyǵy men óz jasyna "jas kórinýi" kópti tańǵaldyrdy. Jurttyń janaryn jaýlaǵan Qalmurzanyń anasy medıa salasynyń mamany ekeni belgili boldy.
"Samat Smaqovtyń bolashaq kúıeý balasy"
Al Sherhannyń júreginiń ıesi ózinen eki jas úlken - Samıra esimdi arý. Ol Qazaqstanǵa tanymal fýtbolshy Samat Smaqovtyń qyzy ekeni belgili boldy. Qalmurzanyń "qalaýlysy" áleýmettik jelide Sherhanmen ara-qatynasy jaıly ashyq jarıalap otyrady.
"Sen - men úshin nómer birsiń. Árdaıym seniń janyńdamyn! Tek alǵa, Shera!", - dep jazdy ol óziniń keıingi storısinde Qalmurzany belgilep.
Sherhannyń anasy da ulynyń súıiktisi jaıly habardar. "Bolashaq kelinimen" qarym-qatynasy óte jaqsy ekenin, tipti Samıranyń anasymen de jaqsy aralasatyndaryn jazǵan edi.
