Almatyda densaýlyq saqtaý máseleleri jóninde Úılestirý keńesiniń otyrysy ótti, - dep habarlaıdy Aqshamnews.kz tilshisi.
Densaýlyq saqtaý nysandaryn qamtamasyz etý jáne medısınalyq qyzmet kórsetýdi monıtorıńteý – basym baǵyttardyń biri.
Jyl saıyn medısınalyq qyzmetterdiń sapasyna, dári-dármekterge jáne zamanaýı dıagnostıkalyq jabdyqtarǵa suranys artyp keledi.
Almaty qalasynyń prokýrory Serik Qáripbekovtyń tóraǵalyǵymen memlekettik jáne quqyq qorǵaý organdarynyń birinshi basshylary, sondaı-aq qalanyń densaýlyq saqtaý júıesiniń jetekshileriniń qatysýymen Úılestirý keńesiniń otyrysy ótti.
Kún tártibinde Qoǵamdyq densaýlyq saqtaý basqarmasy men Áleýmettik medısınalyq saqtandyrý qorynyń Almaty qalalyq fılıalynyń qyzmetine júrgizilgen tekseristiń nátıjeleri qaraldy.
Qaladaǵy densaýlyq saqtaý uıymdaryn damytý men jumys isteýine bólingen búdjet qarajattaryn josparlaý, bólý jáne paıdalaný kezinde zańnamanyń kóptegen buzýshylyqtary anyqtaldy.
Úılestirý keńesiniń qorytyndysy boıynsha densaýlyq saqtaý júıesiniń jumysyn kúsheıtýge baǵyttalǵan birqatar birlesken sheshimder qabyldandy.