Turarbek TÓLENDIEV, Qazaqstan Respýblıkasynyń eńbek sińirgen dárigeri:
Qandaı memleket bolsyn, onyń halqynyń densaýlyǵy da sol eldiń ekonomıkalyq-áleýmettik damýynyń kórsetkishi bolady. Endeshe, «Birinshi baılyq – densaýlyq» degen sóz beker aıtylmasa kerek.
Bizde keıingi jyldary medısına salasynda qanshama iri reformalar jasaldy. Mysaly, densaýlyq saqtaý kodeksi, áleýmettik saqtandyrý baǵdarlamasy qabyldandy. Biraq ońdy bir ózgeris bola qoıǵan joq. Prezıdentimiz Qasym-Jomart Kemeluly Toqaev keshegi Joldaýynda osy densaýlyq salasynyń qarjylandyrylýyn synǵa alǵany beker emes.
Endi erikti medısınalyq qamsyzdandyrý júıesi engizilýi múmkin. Shyn oıymdy aıtar bolsam, bul júıe aıtarlyqtaı bir ózgeris jasaı qoıady deı almaımyn. Halyqtyń jaǵdaıy máz emes. Medısınada, ásirese, maman kadrlar daıarlaýda sapa tómen. Qazirgi kúni júrdim-bardym oqyp shyqqandar jeterlik. Aýrýdyń emin taýyp, jazý bylaı tursyn, jyly qabaq tanytpaıtyn dárigerler de kúndelikti ómirde kezdesip jatady. Biz dárigerlerdi daıarlaýda olardyń saýatty, bilikti maman bolyp shyǵýyna asa kóńil bólýimiz kerek. San emes, sapa qajet. Sebebi, dárigerdiń qolynda adamzattyń taǵdyry turady. Medısınalyq mekemeler sapaly da zamanaýı tehnıkalyq aspaptarmen qamtamasyz etilýi de mańyzdy. Naýqastardy ary-beri sandaltýdy qoıý kerek. Shalǵaı eldimekenderde aýrýy asqynǵan, biraq qalaǵa jetýge qarajaty joq aǵaıyn qanshama! Tisi túsken, onkologıalyq jáne taǵy basqa da aýyr syrqatqa shaldyqqan el-jurttyń jaıy meni de alańdatady. Aýyl halqynyń densaýlyǵyna asa kóńil bólýdi Prezıdent óte durys aıtty. Memleket basshysy ár aýdanda klınıkalyq aýrýhanalar salyp, jabdyqtaýdy, olardy bilikti mamandarmen qamtamasyz etýdi tez arada qolǵa alýdy tapsyrýy óte quptarlyq. Medısınalyq joǵary oqý oryndarynyń janynan kópbeıindi aýrýhanalar jáne klınıkalar ashylady dedi. Aldaǵy úsh jylda rezıdentýraǵa bólinetin grant sany 70 paıyzǵa kóbeımek. Bul qadamdar densaýlyq salasyna jańa lep ákeledi dep sengim keledi.
«Ulttyq qor – balalarǵa» atty múldem jańa baǵdarlama ashylady dedi. Eleń ettim. Aty, zaty ózgeshe eken. Odan da jaqsylyq kútemin. Sebebi, Jańa Qazaqstandy jasaıtyn sol urpaq.
Qazirgi kúni baǵanyń ósýi, azyq-túliktiń tapshylyǵy, jemqorlyq, ishki, syrtqy saıasattaǵy beımaza ahýal kóptiń kóńiline alań týǵyzyp júrgeni jasyryn emes. Prezıdentimizdiń «elimizge bolsyn» degen adal nıetine, jasampaz qadamdaryna kedergi keltirip, kúıe jaqqysy keletin keıbir toptardyń áreketterin aqymaqtyq dep oılaımyn. Qanshama jumys istelip jatsa da, kórgimiz kelmeıdi. Memleket basshysy eshqashan máńgilik Prezıdent bolmaıtynyn basa aıtyp, jeti jyl merzimge ǵana saılanǵanyn durys dedi. Kelisemin. Memleket basynda otyrǵan kim-kim de jeti jyl ishinde elge laıyqty Prezıdent, ıaǵnı izbasaryn tárbıelep, daıyndap, halyqqa usynatyn da shyǵar. Ony aldaǵy ýaqytta kóre jatarmyz. Al qazir Joldaýda aıtylǵan qadaý-qadaý tapsyrmalardyń júzege asýyna jalǵyz Prezıdent emes, biz de, halyq, qoǵam bolyp atsalysýymyz kerek dep oılaımyn. İske sáttilik tileımin, el aman, jurt tynysh bolsyn!