AUYL SPORT jobasy óziniń aýqymyn keńeıtip, aýyldyq jerlerde jańa sport túri – ústel tenısin engizýdi josparlap otyr. Bul bastama Halyk qaıyrymdylyq qory men Qazaqstan Respýblıkasynyń Ústel tenısi federasıasy arasyndaǵy yntymaqtastyqtyń nátıjesinde júzege asýda, dep habarlaıdy aqshamnews.kz
Negizgi maqsat – aýyldyq aımaqtarda ústel tenısin damytý, balalardy sportqa tartý, sondaı-aq jattyqtyrýshylar men tóreshilerdiń biliktiligin arttyrý. AUYL SPORT jobasy arqyly aýyl balalary jańa múmkindikterge qol jetkizip, óz qabiletterin shyńdaı alady. Joba aıasynda taraptar ádistemelik qoldaý kórsetý, jarystar men basqa da sporttyq sharalardy uıymdastyrý boıynsha kelisimge kelgen. Bul yntymaqtastyq sonymen qatar qaıyrymdylyq mádenıetin qalyptastyrý men buqaralyq sportty damytýǵa baǵyttalǵan.
"Aýyldaǵy sportty damytý – bizdiń qordyń basty mindetteriniń biri. Biz óńirlerde buqaralyq sportty qoldaý maqsatynda kóptegen jobalardy iske asyryp kelemiz. AUYL SPORT jobasyna ústel tenısiniń qosylýy – balalar men jasóspirimder úshin úlken múmkindik," – dep atap ótti Halyk qorynyń atqarýshy dırektory Ǵalymbek Jaqsylyqov.
Ústel tenısi – álemdegi eń qoljetimdi sport túrleriniń biri, óıtkeni ol qymbat jabdyqtardy qajet etpeıdi jáne aýyldyq mektepterde de uıymdastyrýǵa bolady. Qazaqstanda ústel tenısi sportyn damytý jalǵasýda, al AUYL SPORT jobasy arqyly aýyl balalarynda kásibı deńgeıge jetý múmkindigi paıda bolady.
AUYL SPORT – bolashaq chempıondarǵa arnalǵan alań
2024 jyly iske qosylǵan AUYL SPORT jobasy aýyl balalary úshin eń iri sporttyq bastamalardyń birine aınaldy. Ótken jyly 200 eldi mekennen 12 000 jas sportshy óńirlik týrnırlerge qatysyp, fınalǵa 17 óńirden 1 300 úzdik qatysýshy jetti. Jobada qazirdiń ózinde boks, kúres, karate, basketbol, voleıbol jáne shahmat bar, al 2025 jyldan bastap ústel tenısi sport túri qosylady.
2016 jyldan beri Halyk qory bilim berý, densaýlyq saqtaý jáne sportty damytýǵa baǵyttalǵan 120-dan astam áleýmettik jobany júzege asyrdy.
AUYL SPORT – balalarǵa sportqa qoljetimdilik berip, olardyń minez-qulqyn qalyptastyryp, jańa múmkindikter ashatyn mańyzdy bastama. Bul joba árbir balanyń turǵylyqty jerine qaramastan, sportpen aınalysýyna múmkindik beredi jáne olardyń taǵdyryn ózgertedi.
"AUYL SPORT – bul Halyk qorynyń Qazaqstannyń bolashaǵyna salǵan ınvestısıasy. Ár balanyń óz áleýetin ashýǵa múmkindigi bolýy qajet," – deıdi Ǵalymbek Jaqsylyqov.