Bul ózgertýler ınflásıaǵa baılanysty bolady.
Qazaqstan Úkimeti Aýyl sharýashylyǵy salasyndaǵy jumys berýshilerdi ınflásıanyń deńgeıin eskere otyryp, jalaqyny jyl saıyn ındeksteýge mindettedi, dep habarlaıdy Almaty-akshamy.kz.
Aýyl sharýashylyǵy mınıstrligi agroónerkásiptik keshendegi salalyq kelisimge «Aýyl sharýashylyǵy qyzmetkerleriniń salalyq kásiptik odaǵy» qoǵamdyq birlestigimen jáne AÓK-degi jumys berýshilerdiń salalyq birlestikterimen (qaýymdastyqtarymen, odaqtarymen) 2021-2023 jyldarǵa arnalǵan qosymsha kelisim jasasty.
«Qosymsha kelisim sheńberinde jumys berýshi ınflásıa deńgeıin eskere otyryp, jyl saıyn jalaqyny ındeksteýdi júrgizýge, sondaı-aq agroónerkásiptik keshen qyzmetkeriniń aılyq mólsherlemesiniń (jalaqysynyń) eń tómengi mólsherin arttyrý koefısıentimen belgileýge mindetteledi», - delingen ASHM baspasóz qyzmetiniń habarlamasynda.
Mádenı-buqaralyq jáne dene shynyqtyrý-saýyqtyrý jumystaryn júrgizýge jumys berýshi kásiporyn kásipodaǵyna eńbekaqy tóleý qorynan qarajat bóletin bolady.
Osy jáne basqa da ózgerister AÓK qyzmetkerlerin qoldaýǵa, ádil áleýmettik-eńbek qatynastaryn ornatýǵa, jumyspen qamtýdy keńeıtýge jáne eńbek ónimdiligin arttyrýǵa baǵyttalǵan, sondaı-aq AÓK damytý jónindegi 2021-2025 jyldarǵa arnalǵan ulttyq jobanyń maqsattary men mindetterine yqpal etedi.
Esterińizge sala keteıik, Aýyl sharýashylyǵy mınıstrligi, «Aýyl sharýashylyǵy qyzmetkerleriniń salalyq kásiptik odaǵy» QB jáne jumys berýshilerdiń salalyq birlestikteri (qaýymdastyqtary, odaqtary) arasynda Agroónerkásiptik keshendegi 2021-2023 jyldarǵa arnalǵan salalyq kelisimge 2021 jylǵy maýsymda áleýmettik áriptestik pen áleýmettik jáne eńbek qatynastaryn retteý jónindegi salalyq komısıanyń otyrysynda qol qoıyldy.