Ótken jyly qazaqstandyq mamandar 13 myńnan astam aýyl sharýashylyǵy tehnıkasyn shyǵarǵan.
Qazaqstan Úkimeti otandyq aýyl sharýashylyǵy tehnıkalaryn jasaýdy qoldaý maqsatynda arnaıy ortalyq ashýdy kózdep otyr. Bul týraly sala mamandary arnaıy ótken basqosý barysynda aıtty, dep habarlaıdy Almaty-akshamy.kz.
QR IIDM «Ashyq saǵat alańynda» aýyl sharýashylyǵy mashınasyn jasaý salasynyń búgingi ahýaly men aldaǵy damý baǵyty tarazylandy. Qazaqstan Avtomobıl bıznesi qaýymdastyǵy men «Qazaqstannyń mashına jasaýshylar odaǵy» ZTB ókilderi jáne otandyq birqatar kásiporyn basshylarynyń qatysýymen uıymdastyrylǵan basqosý beınebaılanys rejıminde ótti.
Indýstrıalyq damý komıtetiniń tóraǵasy İlıas Ospanovtyń aıtýynsha, ótken jyly qazaqstandyq zaýyttar 183 mlrd teńge somasynda 13 myńnan astam aýyl sharýashylyǵy tehnıkasyn shyǵarǵan. Bul taraptaǵy óndiristiń jyldyq ósimi 130 paıyzdy qurap, 2,3 esege artqan.
Sonymen qatar bıyl aýyl sharýashylyǵy tehnıkasyn jeńildetilgen lızıńke berý baǵdarlamasyn iske asyrýǵa 40 mlrd teńge bólindi. Onyń 30 mlrd teńgesi «Jasyl Damý» AQ qarajatynan jáne 10 mlrd teńgesi «QazAgroQarjy» AQ kapıtal naryǵynan tartyldy. Budan bólek, «Ónerkásipti damytý qory» traktorlar men kombaındardy lızıńtik qarjylandyrý úshin 7 mlrd teńge qarajat bólmek.
«Elimizde aýyl sharýashylyǵy mashınasyn jasaýdy damytý — basymdyqqa ıe memlekettik mindettiń biri. Osy rette otandyq aýyl sharýashylyǵy tehnıkalaryn jasaýdy qoldaý maqsatynda Aýyl sharýashylyǵy mashınasyn jasaýdy damytýdyń ulttyq ortalyǵy qurylatyn bolady. Qazirgi kúnde bul baǵytta tıisti jumystar júrgizilýde. Sebebi, elimizde agrarlyq sektorda resýrstar jetkilikti jáne bul ónimderdi tutynýshylar sany basym», – dep atap ótti Indýstrıalyq damý komıtetiniń tóraǵasy.
«Ashyq saǵat alańynda» mamandar saladaǵy birqatar túıtkildi máseleni ortaǵa salyp, ońtaıly sheshý joldaryn qarastyrdy. Jıyn barysynda kóterilgen saýaldar men usynystar boıynsha arnaıy taldaý jumystary júrgiziletin bolady.