Qazaq ǵalymdary jylqynyń jańa túrin shyǵardy.
Abaı oblysynyń Besqaraǵaı aýdanynda mamandar uzaq jylǵy seleksıalyq jumystardyń nátıjesinde qazaq jylqysynyń «Besqaraǵaı zaýyttyq tıpin» shyǵardy, dep habarlaıdy Almaty-akshamy.kz.
Bul – táýelsizdik jyldaryndaǵy mal asyldandyrý salasyndaǵy ǵalymdardyń alǵashqy jetistigi.
«Tarıhqa qarap otyrsaq, jylqy qazaq jerinde úıretilgen. Botaı qazbasy da ony dáleldedi. Túrikmenderde aqalteke bar, arabtardyń taza qandy tulpary bar, Anglıada taza qandy jylqy bar. Oılana kele, qazaq jylqysynyń da sapasyn sondaı deńgeıge nege kótermeske degen arman boldy», - deıdi sharýa qojalyǵynyń ıesi Habıdolla Muqınov.
Qazaqy jylqylardy býdandastyrý arqyly jańa tıp shyǵarý jumystary 1968 jyldan bastaldy. Sodan bergi birneshe býyn ǵalymdardyń eńbegi jemisin berip otyr.
«Egemendik alǵan kezden birinshi ret «Besqaraǵaı tıpi» jylqy sharýashylyǵynda bekip otyr. Qazaqtyń óziniń ár jerde shyqqan tıpterin qosý arqyly, jergilikti jylqyny iriletip, salmaǵyn joǵarylatyp. Ormandy jerge beıimdelgen. Tóldi jaqsy beredi», - deıdi aýyl sharýashylyǵy ǵylymdarynyń kandıdaty Qaırat Isqan.
Shoıynqara men Baıtory jylqysynyń tiri salmaǵy 700 kelige deıin barady. Quıryq-jaly tógilgen qurysh tuıaqtylar patenttelgenge deıin túrli kórmelerde talaılardy tańdaı qaqtyrǵan. Qazir sharýashylyqta jylqy sany 200-den asady. Aldaǵy ýaqytta sanyn kóbeıtip asyldandyrý jumystary jalǵasa bermek.