Qaýlyǵa Premer-Mınıstr qol qoıdy.
Úkimet Aýyldyq aýmaqtardy damytýdyń 2023-2027 jyldarǵa arnalǵan tujyrymdamasyn bekitti, dep habarlaıdy Almaty-akshamy.kz
Tujyrymdama aýyldyq aýmaqtardyń geografıalyq erekshelikteri men artyqshylyqtaryn eskere otyryp, olardyń áleýmettik-ekonomıkalyq áleýetin asha túsýge baǵyttalǵan. Onyń aıasynda aýyl turǵyndarynyń tabysy men turmys sapasyn arttyrý boıynsha túrli sharalar qarastyrylǵan.
Qasym-Jomart Toqaev 2022 jylǵy qarasha aıynda QR Prezıdenti laýazymyna kiriskennen keıin osy Tujyrymdamany ázirleý týraly Jarlyqqa qol qoıdy.
Qujatta «Aýyl – El besigi» jobasy aıasynda respýblıka boıynsha aýyl turǵyndarynyń 90%-y ómir súrip jatqan damý áleýeti joǵary 3,5 myń aýyldyq eldi mekendi (AEM) keshendi jańǵyrtýǵa basa nazar aýdarylǵan. Mundaı eldi mekender adamdardyń eńbek etip, ómir súrýine qolaıly jaǵdaılar jasaý esebinen ekonomıkalyq ósýdiń jańa núktelerine aınalady.
Negizgi maqsattardyń biri – aýyldyq eldi mekenderdegi áleýmettik, ınjenerlik jáne kólik ınfraqurylymyn damytý. Atap aıtqanda, jańa mektepter men medısınalyq nysandar salynyp, sýmen jáne elektrmen úzdiksiz jabdyqtalady, keń jolaqty ınternet jáne ǵaryshtyq baılanysy tartylady, aýyl joldarynyń sapasy jaqsaryp, kitaphana, klýb, mýzeı jáne kınoteatr, sport ǵımarattary sıaqty mádenı nysandar salynady, halyqqa qyzmet kórsetý ortalyqtary ashylady.
Turǵyn úı qurylysyn jandandyrý úshin jańa jer ýchaskelerine ınjenerlik komýnıkasıalardy júrgizý jumystary jalǵasady. Bul rette aýyldyq eldi mekenderde óz qyzmetkerlerine úı salyp bergen jumys berýshilerdiń shyǵyndary jalpy alańy 100 sharshy metrden aspaıtyn úı qunynyń 50% mólsherinde sýbsıdıalanatyn bolady.
Aýyldyq jerlerdegi qoǵamdyq qaýipsizdikti kúsheıtý úshin zamanaýı ýchaskelik polısıa pýnktterin salý, aýdan ortalyqtarynda beınebaqylaý júıesin engizý, aýyldarda jaıaý júrginshiler joldary men mal aıdaý aımaqtaryn belgileý, shomylýǵa ruqsat etilgen jáne jabdyqtalǵan oryndar qurý boıynsha jumystar júrgiziledi.
Oǵan qosa shekaralas aýyldyq eldi mekenderdi damytýǵa erekshe nazar aýdarylatyn bolady. Atap aıtqanda, ınfraqurylymdy jańartý men negizgi qyzmetterdi qamtamasyz etýdiń arqasynda halyqtyń eldi mekenderden kóshýin azaıtý, adamdardyń ómir súrýine qolaıly jaǵdaı jasaý jáne jalpy shekara mańyndaǵy aýdandardyń ekonomıkalyq damýyna jańa serpin berý josparlanyp otyr. Al eńbek tapshylyǵy bar óńirlerdiń shekaralas aýyldyq okrýgter turǵyndarynyń jalaqysyna ústemeaqy qosý múmkindigi qaralady.
Sonymen qatar tujyrymdama aıasynda topyraq qunaryn jaqsartý, aýyl sharýashylyǵy jerlerin utymdy paıdalanýǵa baqylaýdy kúsheıtý, jańa sýarmaly ýchaskelerdi aınalymǵa engizý, sý qoımalaryn rekonstrýksıalaý jáne salý, ónimdilikti arttyrý, daqyldardy ártaraptandyrý jáne t.b. boıynsha júıeli sharalar kózdelgen.
Aýyl turǵyndarynyń tabysyn arttyrý máselesin agroónerkásip óndirisin jandandyrý, kásipkerlikti jáne aýyl sharýashylyǵy kooperasıasyn damytý arqyly sheshý josparlanyp otyr. Osylaısha, shaǵyn sharýashylyqtardy biriktirý jáne aýyl sharýashylyǵy kooperatıvterin uıymdastyrý fermerlerge tuqym, tyńaıtqysh, janar-jaǵarmaı materıaldary, jem-shóp, agrotehnıkalyq jáne veterınarıalyq qyzmetter shyǵyndaryn qysqartýǵa, jer ýchaskelerin, aýyl sharýashylyǵy tehnıkasyn, ırrıgasıalyq jáne drenajdyq júıelerdi birlesip paıdalaný esebinen óndirilgen ónim kólemin arttyrýǵa, sondaı-aq deldaldarsyz turaqty túrde taýar ótkizip otyrýǵa múmkindik beredi.