Aýyl mektebi sý astynda qalǵan. Bir qynjyltatyny, jergilikti bılik bul jaǵdaıǵa baılanysty sharasyzdyq tanytqan
Batys Qazaqstan oblysy, Qaratóbe aýdanyna qarasty Shalǵyn degen shaǵyn ǵana aýyl bar. Onyń baryn biri bilse, biri bile bermes. 1988 jyly boı kótergen mektep sodan beri kúrdeli jóndeý kórmegen, dep habarlaıdy Almaty-akshamy.kz sarapshy.info saıtyna silteme jasap.
Mektep ákimshiligi oqýshylardyń bilim alýyna barynsha jaǵdaı jasap, óz jyrtyqtaryn ózderi jamap kelgen. Aýyl bop jańa korpýsty da ózderi jalǵap salyp alǵan. Aýdan tarapynan eshqandaı kómek kórsetilmegen.
Qazirgi jaǵdaıy óte múshkil. 2022 jyldyń 28 naýryzy kúni qyrdan kelgen qyzyl sý mekteptiń jalǵanǵan bóligin túgeldeı derlik jalmap ketti. Kitaptar men qujattar sýǵa ketti. Ustazdar men aýyl halqy sharasyz kúıde. Aýyldyń janashyrlarynyń aıtýynsha, Qoskól aýyldyq okrýgi ákimi men aýdandyq bilim bóliminiń basshysy qoldarynda bir kúregi joq, ne alyp kelgen tehnıkasy joq kelip, qur sózben jubatqandaı keıip tanytyp ketip qaldǵan.
Aýyl azamattary óz tehnıkalaryn jumyldyp, traktormen qum tasyp tósep, qyzmetkerler birese sý tasyp, birese kitap men qujat tasyǵan. Kelgen atqaminerler «osy mektepti jappaı otyrǵanymyzǵa rahmet aıtyńdar» degendeı sózben túırep, qorqytqandaı boldy.
Aýyl turǵyndary halyqtyń osy jerde shoǵyrlanyp, tútinin tútetip otyrǵandaǵy sebebi – balalarynyń bilim alatyn mektebi ǵana dep otyr. Mektep joıylsa, aýyl da údere kóshpek.
Bala sany az bolǵasyn, mektep ustazdary men ata-analar patronattyq tárbıege bala alýdy josparlar otyr. Qazirgi tańda qujattyq jumystar júrgizilýde, aldaǵy oqý jylyna deıin máseleniń oń sheshimi tabylady degen senimde aýyl jurty.
Shaǵyn ǵana mekteptiń taýdan talantty shákirtteri men bilimdi ustazdary kópke úlgi. Bıylǵy oqý jylynyń ishinde 17 oqýshy túrli aýdandyq jarystardan jeńimpaz atanyp, oblystan júldemen oraldy.
Aýyl turǵyndary jaqsylyqtan úmit úzbeıdi, olardyń jańadan mektep salynyp, ustazdar men oqýshylarǵa jaıly jaǵdaı jasalsa degen tilekteri ǵana bar.