Bul týraly Premer-Mınıstr Álıhan Smaıylov «Amanat» atynan saılanǵan máslıhat depýtattarynyń respýblıkalyq forýmynda aıtty.
«Aýyl amanaty» jobasyna jeti jylda 1 trln teńge bólinetinin aıtty, dep habarlaıdy Almaty-akshamy.kz QazAqparatqa silteme jasap.
«Agroónerkásip kesheninde 536 mlrd teńgeni quraıtyn 300-ge jýyq joba iske asyrylýda. Kóktemgi egis jáne egin jınaý jumystaryna jeńildetilgen kredıt berý kólemi bıyl 140 mlrd teńgege deıin ulǵaıtyldy. Aýyl sharýashylyǵy tehnıkasyna jeńildikpen kredıt berý 145 mlrd teńgege jetti. Jeńildetilgen baǵamen egis jumystaryna 419 myń tonna dızel bólindi. Sonymen qatar egin jınaýǵa qosymsha 400 myń tonna arzandatylǵan dızel otyny qarastyrylǵan», - dedi Úkimet basshysy.
Sondaı-aq Premer-Mınıstr bıyl memleket menshigine qosymsha 5 mln gektar aýylsharýashylyq jerleri qaıtarylatynyn atap ótti.
«Aýyldyq aýmaqtardaǵy áleýmettik, ınjenerlik jáne kólik ınfraqurylymdaryn jańǵyrtýǵa basa nazar aýdarylyp otyr. Aýyl halqynyń tabysyn arttyrý úshin «Aýyl amanaty» jobasy iske asyrylýda. Sonyń sheńberinde mıkrokredıt berý jáne kooperasıany keńeıtý kózdelip otyr. Bıyl 100 mlrd teńge bólindi. Joba 7 jyl ishinde 1 mln-nan astam aýyl turǵynyn qamtıdy. Oǵan jalpy 1 trln teńge qarastyrylady», - dedi Álıhan Smaıylov.