Bul týraly Úkimet otyrysynda Ulttyq ekonomıka mınıstri Álibek Qýantyrov aıtty.
«Aýyl amanaty» jobasyn iske asyrýda 17 myń jeńildetilgen nesıe beriledi, dep habarlaıdy Almaty-akshamy.kz QazAqparatqa silteme jasap.
«İs-sharalar kesheniniń birinshi baǵyty – «Ónim óndirý kólemin ulǵaıtý». Bul baǵyt óndirýshiler arasynda áleýmettik-kásipkerlik korporasıalar men aýyl sharýashylyǵy taýarlaryn tikeleı satyp alýdan forvardtyq sharttar jasasýǵa kóshý jolymen turaqtandyrý qorlarynyń jumysyn qaıta formattaý jónindegi sharalardy qamtıdy. Sondaı-aq, bıyl 17 myń jeńildetilgen shaǵyn nesıe berýge, 18 myń jumys ornyn qurýǵa baǵyttalǵan aýyl halqynyń tabysyn arttyrý jónindegi «Aýyl amanaty» jobasyn iske asyrý bastalady», - dedi Álibek Qýantyrov.
Sonymen qatar ol jańa sút-taýarly fermalardy qurý jáne jumys istep turǵandaryn keńeıtý boıynsha 24 jobany jeńildetilgen qarjylandyrý arqyly Soltústik Qazaqstan oblysynyń tájirıbesi qoldanylatynyn aıtty.
«İshki naryqtyń qajettiligin qamtamasyz etý maqsatynda qurylys materıaldaryn, jeńil, hımıa jáne farmasevtıka ónerkásibi taýarlaryn óndirý boıynsha ımportty almastyratyn jobalardy iske asyrý jalǵastyrylady. Sondaı-aq, osy jyly qus etin óndirý boıynsha 19 jobany jáne et ónimderin óńdeý boıynsha 17 jobany iske asyrý bastalady. Bul 249 myń tonna qus etin jáne 32 myń tonna et ónimderin óndirýge múmkindik beredi», - dedi mınıstr.