Ákimder saılaýy kezinde Ortalyq saılaý komısıasy óz ókilettikteri sheńberinde aýmaqtyq saılaý komısıalaryna ádisnamalyq kómek kórsetetip, saılaý qujattarynyń nysandaryn belgileıdi jáne saılaý is-sharalaryn qarjylandyrýdy qamtamasyz etedi.
Bul týraly Ortalyq saılaý komısıasynyń múshesi Erlan Daýylbaev baıandady dep habarlaıdy Almaty-akshamy.kz "Egemen Qazaqstan" basylymyna silteme jasap.
«Saılaý týraly» Konstıtýsıalyq zańnyń 113-1-babyna sáıkes, saılaý taǵaıyndaý úshin mynalar negiz bolyp tabylady. Birinshi – aýdandyq mańyzy bar qala, aýyl, kent, okrýg ákiminiń zańmen belgilengen ókilettilik merziminiń aıaqtalýy. Ekinshi – aýdandyq mańyzy bar qala, aýyl, kent, okrýg ákimi ókilettigin merziminen buryn toqtatý nemese zańda belgilengen jaǵdaılarda tıisti ákimshilik aýmaqtyq birlikti qaıta uıymdastyrý. «Saılaý týraly» Konstıtýsıalyq zańǵa sáıkes saılaýdy aýmaqtyq saılaý komısıalary keminde 40 kún buryn taǵaıyndaıdy jáne jumys istep otyrǵan ákimniń ókilettik merzimi aıaqtalǵanǵa deıin keminde 10 kún buryn ótkizedi», – dedi Erlan Daýylbaev.
Onyń aıtýynsha, ákimniń ókilettiligi merziminen buryn toqtatylǵan jaǵdaıda saılaý taǵaıyndalǵan kúnnen bastap 1 aı ishinde taǵaıyndalady jáne 1 aı merzimde ótkiziledi. Iaǵnı naýqan uzaqtyǵy – 1 aı, usyný úshin – 2 apta, tirkeý kezeńi 10 kún buryn aıaqtalady. Saılaý kúni týraly habar jergilikti buqaralyq aqparat quraldarynda jarıalanady.
«Kandıdattardy usyný saılaý taǵaıyndalǵan kúnnen keıingi kúni bastalady jáne saılaý ótkiziletin ýaqytqa 15 kún qalǵanda jergilikti ýaqytpen saǵat 18.00-de aıaqtalady. Eger usyný merzimi aıaqtalatyn kúnge deıin aýyldyq mańyzy bar qala, aýyl, kent, aýyl okrýgine ekeýden kem kandıdat usynylsa, onda aýdandyq saılaý komısıasy kandıdattardy usynýdy 5 kúnnen aspaıtyn merzimge uzartady. Kandıdattardy usynýdyń birneshe tásili bar. Birinshi, saıası partıalar óz músheleriniń arasynan usynady. Bul rette saıası partıa bir saılaý okrýginde bir ǵana kandıdat usynýǵa quqyly. Ekinshi, daýys berýge quqyǵy bar tıisti okrýg saılaýshylarynyń jalpy sanynyń keminde 1 paıyzynyń qolyn jınaýdy qamtamasyz ete otyryp, ózin-ózi usyný arqyly júzege asyrady. Úshinshi, eger usyný aıaqtalatyn kúnge ekeýden kem kandıdat usynylsa, aýdan ákimi usynady. Bul rette usynylǵan kandıdattar bolmaǵan ne usyný merzimi aıaqtalatyn kúni 1 kandıdat usynylǵan jaǵdaıda aýdan ákimi jergilikti qoǵamdastyq jınalysynyń kelisimi boıynsha tıisinshe eki ne bir kandıdatty usynýǵa quqyly», – dedi Ortalyq saılaý komısıasynyń múshesi.