Onyń konkýrstyq jumysy Qazaqstannyń kúrt kontınenttik klımatynda ushqyshsyz ushý apparattarynyń muzdaný problemasyn sheshýmen baılanysty boldy.
Qazaqstan Qorǵanys mınıstrligi baspasóz qyzmetiniń málimetinshe, Áskerı bilim jáne ǵylym departamentiniń ofıseri, kapıtan Dáýren Qasenov birinshi dárejeli dıplommen jáne «TMD-nyń úzdik jas ǵalymy – 2021» medalimen marapattaldy dep habarlaıdy Almaty-akshamy.kz
Nur-Sultanda ǵylymı halyqaralyq konferensıa jáne Táýelsiz Memleketter Dostastyǵy ǵalymdarynyń «Úzdik jas ǵalym – 2021» halyqaralyq kitap toptamasynyń úshinshi nómiriniń tusaýkeseri ótti.
Kapıtan Dáýren Qasenov jetekshi otandyq jáne sheteldik ǵylymı jýrnaldarda jarıalanǵan 30-dan astam ǵylymı maqalanyń avtory, úsh kitaptyń teń avtory, avtorlyq quqyq obektisine quqyqtardy memlekettik tirkeý týraly tórt kýáliktiń jáne paıdaly modelge bir patenttiń ıesi bolyp tabylady.
Aǵymdaǵy jyly ol QR Tuńǵysh Prezıdenti – Elbasy atyndaǵy Ulttyq qorǵanys ýnıversıteti ǵylymı-zertteý tobynyń quramynda otandyq «Shaǵala» ushqyshsyz ushý apparatyn jasaý boıynsha qoldanbaly ǵylymı zertteýlerge qatysty.
Áskerı qyzmetshi óz qyzmetinde «Búgin múmkin emes nárse erteń iske asyrylýy múmkin» degen urandy basshylyqqa alady. Bul – teorıalyq kosmonavtıkanyń negizin qalaýshy Konstantın Sıolkovskııdiń sózi, ol zymyrandardy, jasandy spýtnıkterdi, orbıtalyq stansıalardy ushyrýdy jáne adamnyń ǵaryshqa shyǵýyn aldyn ala boljaǵan.