Bul týraly Almaty qalasynyń Óńirlik komýnıkasıalar qyzmetinde ótken brıfıńte Oqý-aǵartý mınıstrligi Arnaıy jáne ınklúzıvtik bilim berýdi damytýdyń Ulttyq ǵylymı-praktıkalyq ortalyǵynyń ókilderi aıtty, dep habarlaıdy Almaty-akshamy.kz.
Ortalyq dırektory Áıgerim Kýderınova Almatynyń «Qabyldaý úıinde» 27-28 qazan kúnderi "Múmkindigi shekteýli balalardy oqý prosesine engizý: tarıhy, máseleleri jáne damý bolashaǵy" atty taqyrypta ǵylymı-praktıkalyq konferensıasy ótetinin aıtty. Onyń negizgi maqsaty - arnaıy jáne ınklúzıvti bilim berýdiń ózekti máselelerin talqylaý. Qazirgi ýaqytta Qazaqstan Respýblıkasynda 460 arnaıy bilim berý uıymy jumys isteıdi.
Konferensıa jumysyna QR Oqý-aǵartý mınıstrliginiń ókilderi, otandyq jáne sheteldik jetekshi ǵalymdar, bilim basqarmalary men bilim bólimderiniń mamandary, arnaıy bilim berý uıymdarynyń dırektorlary men mamandary, ÚEU ókilderi, JOO oqytýshylary jáne pedagogtar qatysady.
«e-Ymdau» ymdaý tili boıynsha beınesózdik - bilim berý júıesinde negizgi jáne qosymsha bilim berý baǵdarlamalarynyń oqý materıalyn ıgerý prosesinde ymdaý tilin paıdalanatyn sýrdoaýdarmashylarǵa, mektep, JOO oqytýshylaryna jáne kúndelikti ómirde ymdaý tilin paıdalanatyn estimeıtin azamattarǵa arnalǵan tolyqtyrylatyn ınteraktıvti derekter bazasynyń tanystyrylymy ótetin bolady.
Brıfıń barysynda dıagnostıka-keńes berý bóliminiń meńgerýshisi, psıhologıa ǵylymdarynyń kandıdaty Álıa Ersarına psıhologıalyq-pedagogıkalyq kómek kórsetetin ońaltý ortalyqtarynyń, túzetý kabınetteriniń, arnaıy jáne jalpy bilim beretin mektepke deıingi bilim berý uıymdarynyń psıhologtaryna arnalǵan «Aýtızmi bar balalarǵa arnalǵan arnaıy damytý» baǵdarlamasy jaıynda aıtty. Bul baǵdarlamany ata-analardy aýtızmi bar balany damytý jumysyna tartý maqsatynda qoldanýǵa bolady.
«Buryn mundaı baǵdarlamalar bolmaǵanyn aıta keteıin. Bul baǵdarlamany ázirleýdiń qajettiligi men ózektiligi elimizde aýtızmmen aýyratyn balalar sanynyń jyl saıyn kóbeıýimen baılanysty. 2021 jyldyń sońǵy derekteri boıynsha aýtızm belgileri 8 796 baladan anyqtaldy», - dedi A.Ersarına.
Sonymen birge konferensıa barysynda «Ontogenez barysynda ana tili júıesiniń qalyptasýy» atty monografıa tanystyrylady. Bul týraly ortalyqtyń aǵa ǵylymı qyzmetkeri Almagúl Seısenova aıtty. Onyń aıtýynsha, monografıada sóıleý tili ontogeneziniń lıngvısıkalyq jáne psıhologıalyq negizderi, naqty aıtatyn bolsaq, erte jáne mektepke deıingi jastaǵy balalardyń ana tilin meńgerýdiń teorıalyq máseleleri, bala tiliniń damý kezeńderi, ana tiliniń fonetıkalyq júıesiniń ontogenez barysynda qalyptasýy, ıaǵnı balanyń dybys aıtýynyń paıda bolýy, fonematıkalyq estýiniń damýy, sózdiń býyndyq quramyn meńgerýi, erte jastaǵy balalardyń sózdik qorynyń qalyptasýy, mektepke deıingi jastaǵy balanyń sózdik qorynyń damýy jáne sóıleý tiliniń gramatıkalyq qurylymyn meńgerýdiń keıbir aspektileri aıqyndaldy.