Esirtki ósirýmen aınalysqandardyń zańsyz áreketi
Esirtkige qarsy qylmystyń jolyn kesýge, quramynda esirtki bar ósimdikterdiń zańsyz eginin joıýǵa baǵyttalǵan «Dopıng» respýblıkalyq jedel aldyn alý is-sharasy aıasynda Almaty qalasynyń polıseıleri 1988 jáne 1990 jylǵy jigitterdiń zańsyz áreketterin anyqtady, dep habarlaıdy Almaty-akshamy.kz.
Aǵaıyndy eki jigit aýlalarynda 100-ge jýyq marıhýana butasyn ósirgen.
«Bastapqyda jedel jáne arnaıy is-sharalar kesheni júrgizildi. Jedel aqparat rastaldy. Kúdiktiler ustaldy. Er adamdar Almaty qalasynyń Alataý aýdanynda ornalasqan óz úıiniń aýlasynda marıhýana ósirgeni anyqtaldy. Baqshadan, sot-hımıalyq saraptamaǵa sáıkes, jalpy salmaǵy 24 keli 300 gram bolatyn 98 túp jabaıy qarasora tárkilendi. Bul fakt boıynsha sotqa deıingi tergeý bastaldy, onyń barysynda jastar qandaı maqsatta tyıym salynǵan shópti ósirgeni anyqtalatyn bolady», – dedi Almaty qalalyq polısıa departamentiniń Esirtki qylmysyna qarsy kúres basqarmasynyń bastyǵy Erlan Almaǵambetov.