Keńes áskeriniń shekteýli kontıngentin Aýǵanstannan shyǵarý kúnine arnalǵan aılyq aıasynda №36 qalalyq emhanada aýǵan soǵysy ardagerleri úshin birqatar is-shara ótti.
Emhana dárigerleri men mamandary soǵysqa qatysýshylardyń densaýlyǵy men psıhologıalyq jaǵdaıyna erekshe nazar aýdardy, dep habarlaıdy aqshamnews.kz.
Mańyzdy sharanyń biri - psıholog pen áleýmettik qyzmetkerlerdiń qatysýymen ótken psıhologıalyq trenıń boldy. Sharaǵa qatysýshylar qajetti qoldaý alyp, beıimdelý, streske tózimdik jáne psıhıkalyq densaýlyqqa qatysty mańyzdy máseleni talqylady. Kezdesý jyly ári senimdi atmosferada ótti.
Sonymen qatar emhanada Ashyq esik kúni uıymdastyryldy. Bul kúni ardagerler keshendi medısınalyq tekserýden ótti. Qabyldaýdy tar beıindi mamandar - kardıolog, ýrolog, oftalmolog, nevropatolog jáne endokrınolog júrgizdi. Dárigerler tek dıagnostıka jasap qana qoımaı, barlyq suraqqa tolyq jaýap berdi.
Tekserý nátıjesi boıynsha ardagerlerge qosymsha EKG, MRT, ÝDZ jáne basqa da qajetti dıagnostıkalyq zertteýge joldama berildi. Bul olardyń densaýlyq jaǵdaıyn tolyq baǵalap, der kezinde em taǵaıyndaýǵa múmkindik berdi.
№36 qalalyq emhana ardagerlerge jan-jaqty medısınalyq jáne psıhologıalyq qoldaý kórsetýdi jalǵastyryp, olardyń tarıhtaǵy rólin moıyndap, densaýlyǵyna qamqorlyq jasaýdy basty nazarda ustaıdy.