Almatynyń Áýezov aýdanynda Tóle bı kóshesinen tómen ornalasqan Momyshuly kóshesindegi bos jatqan jer demalatyn, sportpen aınalysyp, serýendeıtin jaıly keńistikke aınaldy.
Bul jumys «Halyq qatysatyn búdjet» baǵdarlamasy arqyly iske asqan.
Óńirlik komýnıkasıalar qyzmeti uıymdastyrǵan pres-týr kezinde, Áýezov aýdanynyń ákimi Abzal Egemberdıev 91 mıllıon teńge bolatyn bul joba aýdan ákimdiginiń qoldaýymen qolǵa alynǵanyn aıtty.
«Biz munda jaqsy jaryqtandyrý júıesin jasadyq. Keshki, túngi ýaqytta bul jerde óte jaryq bolady endi. Keshke munda balalar da, basqa aýdandaǵylar da úı-ishimen keledi. Biz qalada sırek kezdesetin shaǵyn arhıtektýralyq formalardy ornattyq. Alpilik tóbeshik saldyq, aınalasyna otyrýǵa, demalýǵa bolady. Munda sekirmek te bar. Keshkisin adamdar kezekke turady oǵan», - dep aıtty Abzal Egemberdıev.
Buryn bos jatqan aýmaqta qazir mynalar bar: 550 m² brýschatka, 600 m² kógaldy alań s avtomatty sýarý júıesi, 140 aǵash, 27 jaryq baǵany men 11 beınebaqylaý kamerasy, 12 oryndyq pen qoqys jáshigi, tolyqqandy balalar alańy qumsalǵysh, syrǵanaqtar, batýttar, arqan jolaqshasy men shaǵyn arhıtektýralyq formalarmen jabdyqtalǵan, sportpen shuǵyldanýǵa arnalǵan vorkaýt-aımaq, amfıteatr, arka men kolonnalary bar kireberis, sondaı-aq alpilik tóbeshikter men 3D qorshaý.
«Bul jerde biz shaǵyn sahna jasadyq, keshke balalardy jınap, ınteraktıvti sharalar men shaǵyn konsertter ótkizemiz. Bul bizdiń jastarǵa óte paıdaly, olardyń shyǵarmashylyq qabiletin damytýǵa septigi tıedi. Osynyń bárin aparatýramen qamtamasyz etip, konsert te ótkizemiz endi», - dep atap ótti Áýezov aýdanynyń ákimi.
Áýezov aýdany Almatydaǵy eń tyǵyz qonystanǵan aýdan. Basqa aýdandarda ortasha eseppen 1 sharshy shaqyrymda 4 myń adam tursa, Áýezov aýdanynda sonsha jerde 13 myń adam turady. Sondyqtan munda balalar alańy men jasyl aýmaqtar jetispeıdi. Bıyl «Halyq qatysatyn búdjet» jobasy aıasynda 30 joba júzege asyrylyp jatyr. Onyń 24-i jańa qoǵamdyq keńistik, 6 joba – aýlalardy abattandyrýǵa arnalǵan.
Áýezov aýdanynyń ákimi Abzal Egemberdıevtiń aıtýynsha, barlyq jumys 2025 jyldyń 1 qyrkúıegine deıin aıaqtalady.
«İske asqan ár joba – turǵyndardyń ómir sapasyn jaqsartýǵa baǵyttalǵan», - dep atap ótti Abzal Egemberdıev.