Áýezov aýdandyq ákimdigi men Óńirlik komýnıkasıalar qyzmeti uıymdastyrǵan pres-týr barysynda jýrnalıser N. Sas atyndaǵy Orys memlekettik akademıalyq balalar men jasóspirimder teatryn qaıta jańǵyrtý jumysymen tanysty. Teatrdyń kireberisine mármardan jasalǵan panno qoıý – Dinmuhamed Qonaevtyń ıdeıasy.
Jobanyń jetekshisi Asqar Saǵyndyqovtyń aıtýynsha, jumys kezinde tarıhı ǵımarattyń mańyzdylyǵy eskeripti. Tarıhı arhıtektýralyq elementter, onyń ishinde mozaıkamen jasalǵan barelef, baspaldaqtar men qanattar, chehoslovak lústralary qalpyna keltirilmek. Bul lústralar bólshektelip, qaıta qalpyna keltirý úshin jóndeýge jiberilgen.
«Jobany ázirlep jatqanda Qonaev jasaǵan jobany taýyp aldyq, onda kireberisine mármar panno ornatýdy josparlapty. Biraq 15 jyl boıy ony iske asyra almaǵan. Biz osy konsepsıany qalpyna keltirip, tolyq júzege asyrǵaly otyrmyz», - dep atap ótti ol.
Teatr ǵımaraty 1979-1980 jyldary Almatynyń maqta-toqyma kombınatynyń mádenıet úıi retinde salynyp, ony arhıtektorlar Albına Petrova, Gúlzara Djakıpova men Zaýresh Mustafına jobalaǵan.
«Ǵımarattyń qasbetiniń jaǵdaıy óte nashar. Teatr jumys istegen kezde de tastary ózinen ózi úgitilip túsip ketetin. Buryn ony adamdarǵa zaqym keltirmes úshin boltpen bekitip qoıǵan», - dedi Asqar Saǵyndyqov.
Jańartýdan keıin teatrdyń syrtqy kelbeti de, ishki jaǵy da aıtarlyqtaı ózgeredi. Jertóle men tehnıkalyq qabat keńeıetindikten, ǵımarattyń jalpy aýdany 9 800 m²-den 14 680 m²-ge deıin ulǵaıtylady. Biraq kórermenniń oryn sany 781-den 744-ke deıin qysqarady, sebebi jaıly oryndyq ornatyp, qatardyń arasyndaǵy joldy edáýir keńeıtken.
Teatr tolyq tehnıkalyq qaıta jabdyqtaýdan ótedi. Bes kótergish alań, shyǵarylatyn jáne aınalmaly mehanızmder, jańa mýltımedıalyq júıe, sondaı-aq ıntellektýaldy jaryq pen sahnany basqarý júıesi ornatylady. Sonymen qatar, tıimdi jaryqtandyrý júıesi engizilip, bir ortalyqtan basqarylatyn bolady endi.
Teatr aýmaǵynda jańa Black Box formatyna saı kishi sahna ǵımaraty da salynyp jatyr. Ǵımarattyń jalpy aýdany 10 500 m², 220 oryndyq bolady. Bul keńistik túrli formattaǵy spektáklderge beıimdelip, túrlenip otyrady. Kishi sahna negizgi ǵımaratpen jabyq ótkel arqyly baılanysady, bul tarıhı bólikti jańarǵan keńistikpen biriktiredi.
Joba Almaty qalasynyń Qurylys basqarmasy men merdiger uıym «BI Urban Construction» JSHS birlesip júzege asyryp jatyr. Jobanyń jalpy quny 23,9 mıllıard teńge, jańa ǵımarattyń alańy 10 559 m² quraıdy. Qazir jumystar 56%-ǵa, jańa sahnaǵa arnalǵan jerdegi jumys 65%-ǵa aıaqtaldy. Sonymen qatar, qorshaǵan aýmaqty abattandyrý jumystary da qarastyrylǵan. Barlyq qurylys jáne iske qosý jumystaryn 2026 jyldyń shilde aıynda aıaqtaý josparlanyp otyr.