Áýezov aýdanynda aýlalardy kórkeıtý jumystary jalǵasýda: turǵyndarǵa jaıly jaǵdaı qalaı jasalyp jatyr
Áýezov aýdanynda bıyl júzege asyrylǵan mańyzdy nysandarmen tanysý úshin baspasóz týry ótti. Aýdan ákimi Abzal Egemberdıev pen joba qatysýshylary aýdandaǵy jetistikter týraly egjeı-tegjeıli baıandady, dep habarlaıdy aqshamnews.kz
Baspasóz týrynyń alǵashqy nysany №2 shaǵyn aýdanyndaǵy «Halyq qatysatyn búdjet» baǵdarlamasy aıasynda kóriktendirilgen aýla boldy.
Bul aýmaq №41 jáne №42 úılerdiń arasynda ornalasqan. Bıyl munda 390 sharshy metrlik fýtbol alańy salyndy, balalar jáne sporttyq alańdar jańartyldy, 19 kóshe jaryǵy tirekteri men 12 beınebaqylaý kamerasy ornatyldy. Sondaı-aq 300 metrlik jasyl qorshaý jáne 50 aǵash otyrǵyzylyp, 3 myń sharshy metrden astam jasyl jelekti sýarý júıesi iske qosyldy. Uzyndyǵy 400 metr trotýar tóseldi.
Aýlany sońǵy ret qaıta jańartý 2017 jyly kúrdeli jóndeý baǵdarlamasy aıasynda júrgizilgen, sodan keıin tek kosmetıkalyq jáne aǵymdaǵy jóndeý jumystary júrgizilgen.
Byltyr Erbolat Dosaevtyń tapsyrmasy boıynsha 174 aýla jóndelse, bıyl kúrdeli jóndeý aıasynda 23 aýla qaıta jańǵyrtyldy. Sonymen qatar, «Halyq qatysatyn búdjet» baǵdarlamasy aıasynda 41 aýlany jáne 16 jaıaý júrginshi aımaǵyn qamtıtyn 57 joba júzege asyryldy.
Kelesi nysan №1 shaǵyn aýdandaǵy «Halyq qatysatyn búdjet» aıasynda júzege asyrylǵan jańa skver boldy. №20 úıdiń artyndaǵy bos turǵan jer kádege asty. Munda jaıaý júrginshiler aımaǵy, qarttar men múmkindigi shekteýli jandarǵa arnalǵan trenajerler, sondaı-aq ústi jabylǵan vorkaýt aımaǵy paıda boldy. Jasyl jelekter men alpi tóbeshikterin sýarý júıesi ornatylyp, 90 qaıyń aǵashy otyrǵyzyldy.
«Ózimniń jáne aýdan turǵyndarynyń atynan alǵys aıtqym keledi. Munda skver ashylatynyn estigende qatty qýandyq. Biz zeınetkerler kóbinese úıde bolamyz. Sportpen aınalysyp, uzaq ómir súrgimiz keledi. Sondyqtan osyndaı skver biz úshin úlken baqyt», – dedi aýdan turǵyny Ulmeken Qojanazarova.
Baspasóz týrynyń sońǵy nysany eldegi alǵashqy «Jaıly mektep» jobasy aıasynda salynǵan jańa formattaǵy mektep boldy. №97 mektep qaıtadan salyndy, sebebi burynǵy ǵımarat apatty jaǵdaıda edi.
«Jaıly mektep» jobasy eldegi apatty ǵımarattardy joıýǵa, úsh aýysymda oqýdy azaıtýǵa jáne mektepterdegi oryn tapshylyǵyn sheshýge baǵyttalǵan.
Jańa bilim uıasynda 600 oqýshy oqı alady, otandyq óndiristiń zamanaýı jıhazdarymen, jaratylystaný pánderine arnalǵan zerthanalarmen, akt zalymen, kitaphana jáne kovorkıng aımaǵymen jabdyqtalǵan. Mektep aýmaǵynda voleıbol, basketbol, fýtbol jáne tenıs alańdary ornalasqan. Oqýshylar men pedagogtardyń qaýipsizdigi úshin beınebaqylaý, esikterdi qulyptaý jáne dybystyq sıgnaldardy paıdalaný júıeleri ornatylǵan.
Ekskýrsıa barysynda jýrnalıserge robototehnıka kabınetteri, zerthanalar, sportzal jáne asqana kórsetildi. Baspasóz týry aıasynda aýdan ákimi Abzal Egemberdıev mektep prezıdentimen ústel tenısin oınady.