Almatynyń áýejaıynda mýzeı ashylady. Bul týraly búgin ótken qoǵamdyq talqylaýda belgili boldy, dep habarlaıdy almaty-akshamy.kz.
Ony jańa halyqaralyq termınaldan ashý josparlanǵan eken. 100 sharshy metr aýmaqta uıymdastyrylatyn mádenı oryn kelýshilerdi bıyl qyrkúıek aıynda qabyldaı bastaıdy.
Aıta keteıik, murajaı Almatynyń alǵashqy áýejaıynyń tarıhı kelbetin saqtaı otyryp salynǵan. Onda mańyzdy qujattar qoıylyp, áýe aılaǵynyń tarıhynan syr shertetin derekti fılm kórsetiledi. Sondaı-aq búgin taqyryp aıasynda qoǵamdyq keńes músheleri óz usynysyn aıtty.
«Búgin qoǵamdyq keńes múshelerimen kezdesip otyrmyz. Áýejaı mýzeıine qatysty qandaı da bir usynystary bolsa, sony bizge jetkizse dep búgingi is-sharany uıymdastyrdyq. Sondaı-aq múmkin qala turǵyndarynda áýejaıǵa qatysty muraǵattaǵy qujattar bar shyǵar. Solardy murajaıǵa qoıǵymyz keledi», – dedi Almaty halyqaralyq áýejaıynyń bólim basshysy Iýlıa Allahverdıeva.