«El Samǵaý» qory ushqyshtardy «Qazaqstan avıasıasyna 100 jyl» medalimen marapattady
Ushaqty apattan aman alyp qalǵan qazaqstandyq ushqyshtardy Azamattyq avıasıanyń Ardagerler Odaǵy arnaıy syılyqpen marapattady. Marapattaý rásimi «Air Astana» avıakompanıasynyń ǵımaratynda ótti.
Ekıpaj músheleri – kapıtan Vácheslav Aýshev, ekinshi ushqyshtar Baýyrjan Qarasholaqov pen Sergeı Sokolov 2018 jyly áýede qaýipti jaǵdaıǵa tap bolady. Biraq ushqyshtar az ýaqyt ishinde basqarý júıesin qalpyna keltirip, ushaqty sátti qondyrdy. Air Astana ushqyshtary byltyr osy erligi úshin Hú Gordon-Berge syılyǵyn ıelengen edi.
2018 jyldyń 11 qarashasynda ushqyshtarymyz Lıssabonda (Portýgalıa) bógde uıym kórsetken tehnıkalyq qyzmetten keıin Embraer E190 ushaǵymen bazaǵa qaıtarý reısin oryndaǵan. Sol sátte elerondardy basqarý kabel júıesiniń durys ornatylmaýyna baılanysty, ushqannan keıin ushaq basqarylmaı qalady. Degenmen, ushqyshtar máseleni anyqtap, baqylaýdy ishinara qalpyna keltirip, ushaqty Portýgalıanyń ońtústik-shyǵysyndaǵy Beja áýe kúshteriniń bazasyna qaýipsiz qondyra aldy.
«Air Astana-da 2008 jyldan beri jumys isteımin. Al ushqysh retinde qyzmetimdi 2014 jyldyń aıaǵynda bastadym. Áýede 4800-deı saǵat ushtym. Árıne, sol kúngi reıs ońaı bolǵan joq. Basty maqsatymyz – ushaqty aman-esen jerge qondyrý boldy. Avıasıaǵa kelerde kez kelgen jaǵdaıǵa daıyn bolýdy úıretedi. Jylyna 2 ret emtıhan tapsyryp, bilim jetildiremiz», –deıdi Air Astana áýekompanıasynda ekinshi ushqysh Baýyrjan QARASHOLAQOV.
Jıynda Qazaqstan avıasıasy salasy ardagerleriniń «El Samǵaý» qoǵamdyq qorynyń músheleri avıakompanıa basshysy Pıter Fosterge usynys-tilekterin aıtty.
«Bul qor avıasıa ardagerlerine kómektesý maqsatynda 2012 jyl quryldy. Shyny kerek, 2000 jylǵa deıin zeınetke shyqqan avıasıa salasyndaǵy ardagerlerdiń zeınetaqysy óte az. 90 myń, tipti, odan da az alatyn zeınetkerler bar. Kóbiniń áleýmettik jaǵdaıy tómen. Qordyń quramynda tek ushqyshtar ǵana emes, ınjener-tehnıkter, dıspecherler men bortserikter de bar», – dedi «El Samǵaý» qoǵamdyq qorynyń tóraǵasy Dmıtrıı Abbasuly.