Elimizde sáýir aıynda azyq-túlikke jatpaıtyn taýarlardyń baǵasy 1,3%-ǵa, azyq-túlik taýarlary 0,9%-ǵa, aqyly qyzmetter 0,4%-ǵa ósti.
Ulttyq statısıka búrosynyń málimetinshe, azyq-túlikke jatpaıtyn taýarlardyń ishinde sáýirde baǵanyń eń joǵary ósimi dızel otynyna – 16,1%, benzınge – 9,7% boldy. Naýryz aıymen salystyrǵanda jýý jáne tazalaý quraldary 1,4%, jeke gıgıena quraldary 1,1%, ydys-aıaq 1%, turmystyq tehnıka 0,9% ósti, dep habarlaıdy Almaty-akshamy.kz Ulysmedia.kz-ke silteme jasap
“Azyq-túlik taýarlary arasynda jemis pen kókónis baǵasy edáýir ósken, sáýirde qyryqqabat 4,7%, qyzanaq 4,1%, júzim 3%, alma 2,6%, almurt 2,4% qymbattaǵan. Baǵanyń ósýi kúrishke – 2,7%, salqyndatylǵan sýsyndarǵa – 2,5%, rojkılerge, últrapasterlengen sútke – árqaısysy 2,4%-dan, salqyndatylǵan balyqqa – 2,2%, pasterlengen sút, makaron ónimderine – árqaısysy 2,1%-dan baıqaldy. Bul rette qıar – 11,4%, qaraqumyq jarmasy – 3,7%, kúnbaǵys maıy 2,6%-ǵa arzandady”, – delingen habarlamada.
Qyzmet kórsetý boıynsha baǵalardyń ósýi jolaýshylar áýe kóliginde baıqaldy, bir aıdyń ishinde ushý qyzmeti 17,7% qymbattady. Baǵanyń joǵarylaýy shashtaraz ben sulýlyq salondarynda – 1,5%, jerleýge baılanysty salt-jora jasaý qyzmetterinde – 1% tirkeldi. Sanatorıı qyzmetteri – 1,1%, densaýlyq saqtaý qyzmetteri 0,9% qymbattaǵan.
Óńirler arasynda eń joǵary aılyq ınflásıa Abaı jáne Ulytaý oblystarynda – árqaısysynda 1,4%-dan (ortasha respýblıkalyq deńgeıden 0,5 p.t. joǵary), eń tómengi Astana qalasynda tirkeldi – 0,5%.
Óńirler boıynsha azyq-túlik taýarlary baǵasynyń eń joǵary ósimi Batys Qazaqstan oblysynda 1,8%, azyq-túlikke jatpaıtyn taýarlar boıynsha Almaty oblysynda 3%, aqyly qyzmetterde Túrkistan oblysynda 2,3%.
Aıta keteıik, 19 sáýirde Úkimettiń keńeıtilgen otyrysynda prezıdent Toqaev elimizde ınflásıa sońǵy 15 jylda bolmaǵan deńgeıge jetkenin aıtyp, úkimet músheleriniń baǵany ustap turýǵa baǵyttalǵan qadamdarynan esh nátıje joǵyn málimdedi.
“Jurttyń aı saıyn jumsaıtyn qarjysynyń teń jartysynan kóbi azyq-túlik alýǵa ketedi. Úkimettiń áreketi jetkiliksiz bolyp otyr. Tyıym salý jáne shekteý sharalary ýaqytsha ǵana áser etedi. Mundaı qadamdar qıyndyqtyń betin qaıtarsa da, odan birjola qutylýǵa múmkindik bermeıdi, tipti, máseleni ýshyqtyrady deýge bolady”, – dedi Memleket basshysy.
Sondaı-aq, kúni keshe Májilis depýtaty Elnur Beısenbaev halyqtyń ortasha tabysy men qymbatshylyq jaıly resmı statısıka shyndyqqa saı kelmeıtinin aıtty.