Qazaqstandyqtardy kartalar boıynsha aýdarymdardan salyq alý týraly jańalyq tańǵaldyrdy. Kóptegen azamattar endi árbir aýdarym úshin 12 paıyz salyq tólegenshe, qolma-qol aqsha qoldanǵan durys dep málimdedi, dep habarlaıdy aqshamnews.kz
Ulttyq ekonomıka mınıstrliginiń usynǵan salyq kodeksindegi jańa normalar jobasy týraly aqparatty depýtat Asqat Aımaǵambetov Almatyda, QR Májilisiniń Qoǵamdyq palatasy otyrysynda aıtty. Jańa jobada aýdarymdar týraly naqty aqparat aıtylmaǵanymen, depýtat osy jańa normanyń engizilýi týraly málimdep, onyń 12 paıyz salyq salynýy múmkin ekenin aıtty.
Mysaly, kartadan kartaǵa aýdarym jasaǵanda komısıa 150 teńgeni quraıdy. Biraq, eger salyq kodeksindegi jańa norma qabyldansa, aýdarymdar 12 paıyzǵa qymbattaıdy. Bul ózgeris ekonomıka mınıstrliginiń bankterdiń barlyq qyzmetterine, sonyń ishinde kartalardy paıdalaný, aýdarymdar men banktik qyzmetterge qosymsha qosylatyn salyqtardy qarastyrýy týraly usynysy aıasynda oryn alyp otyr.
Aımaǵambetovtiń aıtýynsha, mınıstrlik bankter bul shyǵyndardy ózderi jabady dep sanasa da, depýtat bunyń múlde shyndyqqa janaspaıtynyn, óıtkeni bankter eshqashan paıdadan bas tartpaıtynyn aıtty. Osylaısha, jańa norma árbir azamatqa áser etedi.
Bul usynysqa qarsylyǵyn bildirgender arasynda Ulttyq bank, Qarjygerler asosıasıasy, sarapshylar men «Atameken» kásipkerler palatasy da bar. Degenmen, mınıstrlik osy ózgeristi salyq kodeksine engizýdi usyndy. Aımaǵambetov bul bastamanyń tek azamattardyń shyǵyndaryn arttyryp qana qoımaı, qarjy júıesine degen senimdi de tómendetetinin aıtady.
Depýtat osy normany ózgertý týraly usynystar engizgenin aıtty, biraq onyń qanshalyqty ádil ekenin halyq ózi baǵalaıtynyn atap ótti.
Bul máselege baılanysty Syrym Itkýlovqa mınıstrlik aýdarymdarǵa salynatyn salyqqa qatysty túsinikteme bergen. Mınıstrliktiń resmı málimdemesine sáıkes, azamattardyń aqshasyna salyq salynbaıdy, salyq tek bankterdiń óz qyzmetterine, atap aıtqanda, aýdarymdar men kartalardy shyǵarý boıynsha alynatyn komısıalardan ǵana alynatyn bolady.
Mınıstrliktiń málimeti boıynsha, buǵan deıin bankter qarjylyq operasıalarǵa qatysty jeńildikterge ıe bolyp, salyq tólemegen. Biraq jańa norma boıynsha bul jeńildikter joıylmaq. Mysaly, basqa bankke 10 000 teńge aýdarǵanda alynatyn komısıadan salyq tólenetin bolady. Al bir bank ishindegi aýdarymdar (mysaly, Kaspi júıesinde) salyqqa tartylmaıdy, sebebi mundaı operasıalarda komısıa joq.
Qazirgi ýaqytta bul ózgeristerdiń naqty qalaı júzege asatyny belgisiz, biraq halyq bul týraly qosymsha aqparat alý úshin kútýi qajet.
Sonymen qatar, salyq kodeksindegi jobada zeınetaqy qorynan alynatyn zeınetaqy tólemderinen jeke tabys salyǵyn alyp tastaý jáne 10 jyldan asqan kólikter úshin kólik salyǵyn 30%-ǵa, al 20 jyldan astam kólikter úshin 50%-ǵa tómendetý usynyldy.