Astana halyqaralyq áýejaıynda Amerıka Qurama Shtattarynan ushyp kelgen 54835-A áskerı bóliminiń batalón serjanty 3-synypty serjant Aslan Darhan men 18404 áskerı bólimi parashúttyq-desanttyq rotasynyń serjanty 2-synypty gvardıa serjanty Raýany Toqtarbekovti saltanatty jaǵdaıda qarsy aldy.
Áskerı qyzmetshiler Arızona shtatynyń Ulttyq gvardıasy eń jaqsy áskerı qyzmetshilerdi anyqtaý maqsatynda serjanttar quramy úshin uıymdastyratyn jyl saıynǵy Best warrior baıqaýyna qatysty, dep habarlaıdy aqshamnews.kz.
Navaho áskerı bazasynda ótken jarysqa AQSH-tyń jeti shtatynan, sondaı-aq Fıdjı, Gýama, Tongı jáne Fılıppın memleketterinen kelgen áskerı qyzmetshiler qatysty.
Konkýrs armıalyq jaýyngerlik fıtnes synaǵynan, jaýyngerlik daıarlyqty oqytý pánderi boıynsha normatıvter tapsyrýdan, top quramyndaǵy taktıkalyq daıyndyqtan, topografıadan, jergilikti jerdi patrúldeýden, taktıkalyq medısınadan, M-240V pýlemetinen, M-4 avtomatynan, M-17 tapanshasynan atýdan jáne 12 kg júkpen tolyq jabdyqta 28 shaqyrymǵa marsh jasaýdan turdy.
– Joǵary básekelestikke, AQSH armıasynyń qarý-jaraq úlgileri men qurylǵylarynda jattyǵýlardyń oryndalýyna qaramastan, bizdiń áskerı qyzmetshiler jaýyngerlik qasıetterin kórsetip, jarystyń úsh túrinde úzdik atandy, – dep atap ótti QR Qarýly kúshteri Bas shtabynyń serjanttyq quramymen jumys basqarmasynyń aǵa nusqaýshy-serjanty shtab-serjant Beglan Beısalıev.
Biz 3-synypty serjant Darhan Aslannyń 800 metr qashyqtyqty 2 mınýt 5 sekýndta júgirip ótip, baıqaý tarıhynda rekord ornatqanyn habarlaǵan bolatynbyz.
Budan bólek bizdiń jigitter 12 kılogramdyq júkpen 28 shaqyrymǵa 3 saǵat 39 mınýttyq marsh jasap, úzdik nátıje kórsetti. Jaýyngerler keremet tózimdilik tanytyp, Qazaqstan týymen márege jetti.
Jaýyngerlik daıyndyq jáne AQSH Qarýly kúshteriniń ártúrli qarý úlgilerinen atý normatıvterin oryndaý kezinde 2-synypty serjant Raýan Toqtarbekov te jaqsy nátıjege qol jetkizip, «Úzdik atqysh» sertıfıkatymen marapattaldy.