Astanada eldegi taý-ken metalýrgıa (TKM) salasyndaǵy korporatıvtik ýnıversıtetterdiń keńeıtilgen formattaǵy halyqaralyq kezdesýi ótti. İs-shara uıymdastyrýshysy – Eurasian Resources Group (ERG). Forým Azıa aýmaǵyndaǵy EFMD-ge múshe korporatıvtik ýnıversıtetter men bilim berý qurylymdary, qyzmetkerlerdi oqytý salasynda eńbek etetin bilim berý mekemeleri men qaýymdastyqtar arasynda Qazaqstandaǵy alǵashqy tájirıbe almasý alańyna aınaldy.
Sharanyń maqsaty – ozyq tájirıbeler, úzdik praktıkalar men ınovasıalyq ustanymdar almasý múmkindikterin keńeıtý. Forýmǵa qatysýshylar kóshbasshylyq, kásibı bilim berý men qyzmetkerlerdi oqytý máselerin keńinen talqylap, halyqaralyq qaýymdastyq moıyndaǵan ozyq keıstermen tanysty.
Negizgi spıkerlerdiń biri – CLIP korporatıvtik ýnıversıteti akredıtasıadan ótý baǵdarlamalarynyń jetekshisi, EFMD korporatıvtik servısteriniń dırektory, doktor Martın Merle. EFMD – álemniń 88 elinde 890 múshesi bar Eýropalyq menedjmentti damytý qory. Ol menedjment pen qyzmetkerlerdi oqytý salalaryndaǵy jetekshi bıznes-mektepter, ýnıversıtetter men korporasıalardy biriktirgen. Oqytý men menedjment salasyndaǵy ozyq tájirıbeler almasýǵa arnalǵan jahandyq tuǵyrnama deýge bolady. Ol bıznestiń básekege qabilettiligin artyrý úshin korporatıvtik oqytýǵa halyqaralyq standarttardy engizýdiń mańyzyna erekshe toqtaldy:
– Biz EFMD tájirıbesinde áriptester qaýymdastyǵy korporatıvtik oqytý standarttaryn damyta otyryp, kompanıalardyń isin jetildirý jolyna barynsha qarqyn bere alatynyna talaı márte kóz jetkizdik. ERG-diń bastamasy Qazaqstandaǵy, tipti Orta Azıadaǵy korporatıvtik oqytý salasyna tyń serpin bere alady degen senimdemiz,- dedi Martın Merle.
Forýmda ERG-diń korporatıvtik ýnıversıteti halyqaralyq sertıfıkasıalaý baǵdarlamalarda júldeli oryndarǵa ıe bolǵan óziniń bilim berý baǵdarlamalaryn tanystyrdy. Ótken jyly ERG-diń korporatıvtik ýnıversıteti halyqaralyq EFMD Excellence in Practice Awards 2024 baıqaýynyń «Kásibı bilim berý» atalymynda «úzdik» dep tanylǵan. Al, bıyl ERG-diń Korporatıvtik ýnıversıteti Qazaqstan men TMD-da alǵashqy bolyp EFMD LIFT Learning Impact standarty boıynsha sertıfıkattaldy.
Bul júlde – bilim berý ónimderin daıarlaý men ony basqarýdaǵy jumystyń sapasy joǵary, ádistemeleri men ázirlemeleri tolyqqandy ári halyqaralyq standarttarǵa sáıkes keletinin rastady. Sertıfıkattaý barysynda ERG CU tómendegi 3 tartymdy jobasyn tanystyrǵan bolatyn:
- karerlerdegi aýyr júk kólikteriniń júrgizýshilerin daıarlaýda trenajer-sımýlátorlardy paıdalaný;
- dánekerleýshi mamandardy daıarlaýda sandyq, tolyqtyrylǵan shyndyq (AR) tehnologıalaryn keńinen paıdalaný;
- Strategic Leadership Program (SLP) kóshbasshylyqty damytý baǵdarlamasy.
TKM salasyndaǵy korporatıvtik ýnıversıtetter forýmy Qazaqstan men Azıada osy korporatıvtik bilim berý baǵytynda jumys istep júrgen qurylymdar arasyndaǵy ózara seriktestikti nyǵaıtýdy kózdeıdi.
– Tıimdi korporatıvtik bilim berý júıesin damytý barysynda árdaıym áriptesterińizben aralasyp, pikir almasyp otyrý mańyzdy. ERG-diń korporatıvtik ýnıversıteti ózge de korporatıvtik oqytý ortalyqtarynyń tájirıbesin synı turǵydan zerdeleı otyryp, óziniń ozyq ádistemelerin ashyq pash etip birneshe jylda halyqaralyq deńgeıge ósti. Bul tolaıym tabysqa ERG-diń Qazaqstanda korporatıvtik oqytý ortalyqtarynyń qaýymdastyǵyn qurý qamyndaǵy novatorlyq bastamasynyń arqasynda jetti. Óz kezeginde bul kásibı damýdy úzdiksiz jetildirip otyrýǵa septesetin tuǵyrnamaǵa aınala alady, - dedi forým sarapshylarynyń biri, ERG korporatıvtik ýnıversıteti ǵylymı keńesiniń táýelsiz múshesi, profesor Valerıı Katkalo.
– Korporatıvtik oqytý júıeleriniń qýaty – bıznestiń senimdi seriktesi bola alýynda. Ol úshin qazirgi álemniń syn-qaterlerine ýaqytyly ún qatyp, tıimdilikti arttyryp otyrý mańyzdy,- dedi ERG korporatıvtik ýnıversıtetiniń dırektory Valentına Satarova. – Biz ERG-de korporatıvtik bilim berýdiń halyqaralyq standarttaryn ustanyp, kompanıany damytý strategıasyn ilgeriletý, adamdarymyzǵa ınvestısıa quıý baǵyttarynda bıznespen birlese, jumyla jumys istep jatyrmyz. Bizdiń jolymyz – damý joly!
Halyqaralyq forýmǵa ERG-diń Qazaqstandaǵy bas dırektory Serik Shahajanov ta qatysyp, sharanyń mańyzyn erekshe atap aıtty:
– ERG-diń korporatıvtik ýnıversıtteti – bizdiń Topty damytýdyń strategıalyq quraly. Biz tek adamdardy damytý arqyly kompanıa alǵa ilgerileı túserine senimdi bolǵandyqtan, adamdarymyzdyń damýyna turaqty ınvestısıa quıyp kelemiz. Sońǵy 2 jylda korporatıvtik ýnıversıtet bizdiń 54 myńnan astam qyzmetkerimizdi oqytyp, sımýlátorlar men VR-dan bastap, ozyq tehnologıalar men halyqaralyq tuǵyrnamalardy engizip, jahandyq deńgeıde moıyndaldy. EFMD Excellence in Practice Awards 2024 baıqaýyndaǵy jeńis pen EFMD LIFT 2025 sertıfıkatyna ıe bolýymyz bilim berý sapasy, bızneske qajetti sheshimderdi tabý men onyń paıdasy – bizdiń óz salamyz boıynsha úzdik bolýǵa degen talpynysymyz ben qolǵa alǵan júıeli jumystyń jemisi.
ERG Qazaqstandaǵy korporatıvtik ýnıversıtetter arasynda alǵashqy bolyp taý-ken metalýrgıa salasy kásiporyndarynyń bárine esigin aıqara ashyp otyr. Top personaldy damytýǵa ınovasıalyq ustanymdardy qoldanyp qana qoımaı, strategıalyq kózqaras pen kóshbasshylyqtyń joǵary deńgeıin pash etip keledi.
ERG Qazaqstanda alǵashqy bolyp 6 taý-ken metalýrgıa kompanıalary arasynda zertteýler júrgizip, benchmark pen saraptama bazasyn qurdy. Osylaı turǵyrnama qalanyp, kompanıa óz bastamasyn keńeıtýge daıar. Ári 2025 jyldan bastap kásibı qaýymdastyq tarapynan da qoldaý taýyp, zertteýge qatysatyn kompanıalar sany ulǵaıa túserine senimdi.